ހައިރައިޒުން އިންތިޒާމްކޮށްގެން މިމަހުގެ 27 ވަނަ ދުވަހު ބާއްވާ "ސައުތު އޭޝިއަން ޓްރެވެލް އެވޯޑް" ސަޓާގެ އެކްސަކުލޫސިވް އިންޝުއަރެންސް ޕާޓްނަރަކަށް އެލައިޑް އިންސުއަރެންސް ހަމަޖައްސައި އެކަމުގެ އެއްބަސްވުމުގައި ސޮއިކޮށްފިއެވެ.
އެއްބަސްވުމުގައި ސޮއެކުރެއްވީ ހައިރައިޒްގެ ޖެނެރަލް މެނޭޖަރ މުހައްމަދު ޝާމިންއާއި އެލައިޑް އިންސުއަރެންސްގެ ޖެނެރަލް މެނޭޖަރ އަޙްމަދު ރިޔާޒީ މުޙައްމަދެވެ.
ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ހައިރައިޒްގެ ޖެނެރަލް މެނޭޖަރ މުޙައްމަދު ޝާމިން ވިދާޅުވީ ސަޓާ އަކީ ދެކުނު އޭޝިޔާ ސަރަހައްދުގައި ފަތުރުވެރިކަމުގެ ދާއިރާގައި މަސައްކަތްކުރާ ބޮޑެތި ކުންފުނިތަކުން ބައިވެރިވާނެ އިވެންޓެއްކަމަށް. މި އިވެންޓްގެ ތެރެއިން ރާއްޖޭގައި ފަތުރުވެރިކަމާއި ހޮޓެލް އިންޑަސްޓްރީގައި ލިބެންހުރި ފުރުސަތުތަކާއި، މިދާއިރާ ކުރިއެރުވުމަށް ކުރެވިދާނެ ކަންކަމާއި ބެހޭގޮތުން މަޝްވަރާކުރާނެކަމަށެވެ.
އެލައިޑް އިންސުއަރެންސްގެ މާކެޓިންގ މެނޭޖަރ ނިއުޝާދު ޝަރީފް ވިދާޅުވީ ފަތުރުވެރިކަމުގެ ދާއިރާގެ މިކަހަލަ ހަރަކާތްތަކަށް އެލައިޑުން އަބަދުވެސް އެހީތެރިކަން ފޯރުކޮށްދޭނެކަމަށެވެ.
400 އަށްވުރެ ގިނަ ފަރާތުން ސަޓާ އެވޯޑަށް ނޮމިނޭޓް ކޮށްފައިވާއިރު، ޖުމްލަ 37 ކެޓަގަރީން އެވޯޑް ދިނުމަށް ހަމަޖެހިފައިވެއެވެ. 3 ދުވަހުގެ މުއްދަތަކަށް ކުރިއަށްގެންދާ "ސައުތު އޭޝިއަން ޓްރެވެލް އެވޯޑްސް" މިފަހަރު އޮންނާނީ އައްޑޫ ސިޓީގެ އިކުއޭޓަރ ވިލެޖްގައެވެ.
ދެކުނު އޭޝިޔާ ސަރަހައްދުގެ 5 ޤައުމަކުން މި އެވޯޑަށް ވާދަކުރާނެއެވެ. އެއީ ދިވެހިރާއްޖެ، ސްރީލަންކާ، އިންޑިޔާ، ނޭޕާލް، އަދި ބޫޓާންއެވެ.