މާދަމާ ފަށާ ވޯލްޑް ޓްރެވަލް މާކެޓް ނުވަތަ ޑަބްލިއުޓީއެމް ފެއަރ ކުރިއަށްދަނީ މިމަހުގެ 6 އަކުން 8 އަކަށް އިނގިރޭސިވިލާތުގެ ލަންޑަނުގެ "އެކްސެލް ލަންޑަން" ކޮންވެންޝަން ސެންޓަރުގައެވެ. މި ފެއަރގައި ރާއްޖޭ ފަސްދޮޅަހަށް ވުރެ ގިނަ ކުންފުންނިން ދުއިސައްތައަށްވުރެ ގިނަ ފަރާތަކުން ބައިވެރިވެއެވެ.
ފެއަރގެ ރާއްޖޭގެ ސްޓޭންޑާއި ގުޅޭގޮތުން ވާހަކަދައްކަވަމުން އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ވިދާޅުވީ ރާއްޖޭގެ ސްޓޭންޑަށް ޒިޔާރަތްކުރާ ފަރާތްތަކަށް ރާއްޖޭގެ ރީތިކަން ވަރަށް ފުރިހަމައަށް ސިފަވެގެންދާނެ ކަމަށެވެ. އަދި އަހަރަކަށްވުރެ އަހަރެއް ޑަބްލިއުޓީއެމް ފެއަރގައި ބައިވެރިވާ ފަރާތްތަކުގެ އަދަދު އިތުރުވަމުންދާ އިރު ރާއްޖޭގެ ސްޓޭންޑުގެ ސައިޒު ބޮޑު ކުރަން ޖެހޭ ކަމަށް ހާރިސް ވިދާޅުވިއެވެ.
img:http://s2.psmnews.mv/images/660x400/15099046535036.jpg|ޑަބްލިޔުޓީއެމް ފެއަރއާ ގުޅޭގޮތުން އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ރާއްޖޭގެ މީޑިއާތަކަށް މަޢުލޫމާތުދެއްވަނީ / ފޮޓޯ: ޕީއެސްއެމް
ހާރިސް ވިދާޅުވީ ޑަބްލިއުޓީއެމް ފެއަރގައި ރާއްޖޭގެ ފަރާތުން ގިނަ ހަރަކާތްތަކެއް ކުރިއަށް ގެންދިޔުމަށް ރާވާފައިވާކަމަށެވެ. އެގޮތުން ރާއްޖޭގެ ކަނޑުތަކުގައި އުޅޭ މިޔަރާއި ބެހޭ ފޮތެއް ނެރުމާއި، ބައިނަލްއަޤްވާމީ މީޑިއާތަކަށް ރާއްޖޭގެ ފަތުރުވެރިކަމާއި ގުޅޭގޮތުން މައުލޫމާތުދިނުމަށް ޙާއްސަ ޕްރެސް ކޮންފަރެންސްއެއް ބޭއްވުމަށް ވަނީ ހަމަޖެހިފައެވެ. މި ޕްރެސް ކޮންފަރެންސްގައި އެޓާރނީ ޖެނެރަލް މުޙައްމަދު އަނިލް އާއި ރާއްޖެއިން އިނގިރޭސިވިލާތަށާއި ބެލްޖިއަމް އަދި ޔޫރަޕިއަން ޔޫނިއަންއަށް ކަނޑައަޅުއްވާފައި ހުންނަވާ ސަފީރު އަޙުމަދު ޝިއާން ބައިވެރިވެ ވަޑައިގަންނަވާނެއެވެ.
މި އަހަރުގެ ފެއަރގައި ޕީއެސްއެމްގެ މޯލްޑިވްސް ޓީވީ ޕްރޮމޯޓް ކުރުމަށްވެސް ހަރަކާތްތަކެއް ކުރިއަށް ގެންދިޔުމަށް ޕީއެސްއެމުންވަނީ ނިންމާފައެވެ.