ފަތުރުވެރިކަމުގެ ދާއިރާގައި މަސައްކަތް ކުރާ ދުނިޔޭގެ ނަން މަޝްހޫރު ކުންފުނިތަކާއި އެކު ވޯލްޑް ޓްރެވަލް މާކެޓް 2017 އިނގިރޭސިވިލާތުގެ ލަންޑަންގައި ފަށައިފިއެވެ.
ވޯލްޑް ޓްރެވަލް މާރކެޓް ޑަބްލިއުޓީއެމް ފެއަރއަކީ ދުނިޔޭގައި ބާއްވާ ދެވަނައަށް އެންމެ ބޮޑު ޓޫރިޒަމް ފެއަރއެވެ. ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަސްހާހާ ގާތްކުރާ އަދަދަކަށް މީހުން މި ފެއަރގައި ބައިވެރިވެފައިވެއެވެ. އަންނަ ބުދަދުވަހުގެ ނިޔަލަށް ކުރިޔަށްދާ މި ފެއަރގައި ރާއްޖޭގެ ފަރާތުން ހަތްދިހައަށް ވުރެ ގިނަ ކުންފުނިން ދުއިސައްތަ އެއްހާ މީހުން ބައިވެރިވެއެވެ. މި ފަހަރުގެ ފެއަރގައި ބައިވެރިވާ ރާއްޖޭގެ ވަފްދުގެ އެންމެ އިސްބޭފުޅެއްގެ ގޮތުން ވަޑައިގަތީ ބަންޑާރަ ނައިބް މުހައްމަދު އަނިލްއެވެ.
ފެއަރގައި ބަހައްޓާފައިވާ ރާއްޖޭގައި ރާއްޖޭގެ ސްޓޭންޑް އިފްތިތާހު ކޮށްދެއްވުމަށްފަހު ދިވެހި ނޫސްވެރިނާއި ވާހަކަދައްކަވަމުން ބަންޑާރަ ނައިބް މުހައްމަދު އަނިލް ވިދާޅުވީ ރާއްޖޭގެ ފަތުރުވެރިކަން ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތްތުގައި މިފަދަ ފެއަރތައް މުހިއްމު ދައުރެއް އަދާ ކުރާ ކަމަށެވެ. މި އަހަރުގެ ފެއަރގައި ރާއްޖެއިން ބައިވެރިވެފައިވާ ފަރާތްތަކުންވެސް މި ފެއަރ އާއި މެދު ފޮނި އުއްމީދު ތަކެއްކުރެއެވެ. ޑަބްލިއުޓީއެމް ފެއަރ ކުރިއަށްދަނީ އިނގިރޭސިވިލާތުގެ ލަންޑަނުގެ "އެކްސެލް ލަންޑަން" ކޮންވެންޝަން ސެންޓަރުގައެވެ.
ޑަބްލިޔު.ޓީ.އެމް ފެއަރއަކީ ފަތުރުވެރިކަމުގެ ދާއިރާގައި މަސައްކަތް ކުރާ ދުނިޔޭގެ ނަން މަޝްހޫރު ކުންފުނިތަކާއި، އޭޖެންޓުން އެއް ތަނަކުން ބައްދަލުވެ، ވިޔަފާރީގެ މުޢާމަލާތްތައް ކުރުމަށް ހުޅުވާލެވިގެންދާ އަގުހުރި ފުރުޞަތެއްކަމުން، މި ފެއަރއިން ރާއްޖޭގެ ޓޫރިޒަމް އިންޑަސްޓްރީ ދުނިޔޭގެ މާކެޓްތަކުގައި އިޝްތިރާހުކުރުމަށް ކުރަމުންދާ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެކަމަށް އެމްއެމްޕީއާރުސީން ދެކެއެވެ.