ޖަރުމަނުވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވާން ފަށައިފިއެވެ.
އެގޮތުން މިއަހަރުގެ އޮކްޓޫބަރުމަހުގެ ނިޔަލަށް ނުވަދިހަ އެއްހާހަށް ވުރެ ގިނަ ފަތުރުވެރިން ޖަރުމަންވިލާތުން ރާއްޖެއަށް ޒިޔާރަތްކޮށްފައިވާއިރު މިއީ ހުސްވި އަހަރުގެ މި މުއްދަތާ އަޅާ ބަލާއިރު ހަތަރެއް އިންސައްތަ އިތުރު އަދަދެކެވެ.
ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ޔޫރަޕްގެ ޤައުމުތަކުންނެވެ. އެގޮތުން ރާއްޖެއަށް ޒިޔާރަތްކުރާ މުޅި ޖުމްލަ ފަތުރުވެރިންގެ ސާޅީސް ހަޔެއް އިންސައްތަ އަކީ ޔޫރަޕްގެ ޤައުމުތަކުން ރާއްޖެއަށް ޒިޔާރަތްކުރާ ފަތުރުވެރިންނެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ޔޫރަޕްގެ ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ޖަރުމަންވިލާތް، އިނގިރޭސިވިލާތް، އިޓަލީވިލާތް، ރޫސީވިލާތް އަދި ފަރަންސޭސިވިލާތުންނެވެ.
މި ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ޖަރުމަންވިލާތުންނެވެ. އަދި ޗައިނާ ފިޔަވައި އެންމެ ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކުރާ ޤައުމަކީވެސް ޖަރުމަނުވިލާތްކަން ފާހަގަކޮށްލެވެއެވެ.
ހުސްވި އަހަރު ނިމުނު އިރު ޖަރުމަންވިލާތުން ރާއްޖެއަށް ސަތޭކަ ހަ ހާސް ތިންސަތޭކަ އަށްޑިހަ ތިން ފަތުރުވެރިން ޒިޔާރަތްކޮށްފައިވާއިރު، މިއީ ދެހާސް ފަނަރަވަނަ އަހަރު ޖަރުމަންވިލާތުން ރާއްޖެއަށް ޒިޔާރަތްކުރި ފަތުރުވެރިންގެ އަދަދާއި އަޅާ ބަލާއިރު އެކެއް ޕޮއިންޓް ދޭއް އިންސައްތަ އިތުރު އަދަދެކެވެ.
ޖަރުމަނުވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވާން ފަށާފައިވާއިރު، މިއަހަރުގެ ފުރތަމަ ހަމަސްދުވަހު، އެ ޤައުމުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދަށްވިކަން ފާހަގަކޮށްލެވެއެވެ.