އަތޮޅުތަކާ މާލެ ޞަރަހައްދުގެ ސަހަރާތަކުގައި މީހުންވަޅުލުމުގެ އިންތިޒާމްތައް ބަލާ، މިހާރަށްވުރެ ރަނގަޅަށް މީހުން ވަޅުލުމުގެ ކަންކަން ކުރިއަށްގެންދެވޭނެ ގޮތްތަކާމެދު ސަޢުދީ ޢަރަބިއްޔާ އާއި ރާއްޖެއިން މަޝްވަރާ ކޮށްފިއެވެ. މިކަމާމެދު މަޝްވަރާ ކުރެއްވީ، މިހާރު ރާއްޖެ ވަޑައިގެން އުޅުއްވާ ސަޢުދީ ޢަރަބިއްޔާގެ މުސްތަޝާރު އައްޝައިހް އަލްދުކްތޫރު މުޙައްމަދު ޙަމްދު އަލް މަޙްނޫޙާއި، އައްޝައިޚް ފަޚްދު އައްސުލައިޙިމާއެކު އިސްލާމިކް މިނިސްޓަރ ޑރ.އަޙްމަދު ޒިޔާދު ބޭއްވި ބައްދަލުވުމެއްގައެވެ.
އެގޮތުން މާލެ ޞަރަޙައްދުގެ ސަހަރާތަކުގައި މިހާރަށްވުރެ ދިގު މުއްދަތަކަށް މީހުން ވަޅުލުމުގެ އިންތިޒާމްތައް ކުރިއަށްގެންދާނެ ގޮތާއި، ސަޢުދީ ޢަރަބިއްޔާ އަދި އެ ނޫންވެސް އިސްލާމީ ޤައުމުތަކުގައި މީހުން ވަޅުލުމުގެ މަސައްކަތް ކުރިއަށްގެންދާ ގޮތްވެސް ސަޢުދީގެ ވަފްދުން ވަނީ އިސްލާމިކް މިނިސްޓަރާ ޙިއްސާކުރައްވާފައެވެ. އަދި ރާއްޖޭގައި މިހާރަށްވުރެ ހަރުދަނާކޮށް މީހުންވަޅުލުމުގެ އިންތިޒާމް ހަމަޖެއްސޭނެ ގޮތްތަކާ ބެހޭގޮތުން ސައުދީގެ ވަފްދުން ވަނީ ފަންނީ ލަފާދެއްވާފައެވެ.
މީގެ އިތުރުން މި ބައްދަލުކުރެއްވުމުގައި ދެ ޤައުމުގެ އިސްލާމިކް މިނިސްޓްރީން ގުޅިގެން އަންނަ އަހަރު ހިންގިދާނެ ޕްރޮގްރާމްތަކާމެދު މަޝްވަރާ ކުރައްވާފައިވެއެވެ. އެގޮތުން ރާއްޖޭގެ ޢިލްމުވެރިންނަށް ޚާއްސަކޮށްގެން ތަފާތު ވޯރކްޝޮޕްތައް ހިންގުމާއި، އެކި ބަސްބަހުން ތައްޔާރުކޮށްފައިވާ ޢަރަބި އިސްލާމީ ފޮތްތައް ހަދިޔާކުރުން ހިމެނެއެވެ.
ސައުދީ ވަފްދުން ވަނީ މާލޭގެ އާ ސަހަރާއާއި ހުޅުމާލެ ސަހަރާ ބައްލަވާލައްވާފައެވެ. މިމަހުގެ 10 ން 14 އަށް ސައުދީ ވަފްދު ކުރައްވާ މި ދަތުރުފުޅުގައި ރާއްޖޭގައި ތިބި ޢިލްމުވެރިންނާ ބައްދަލުކުރެއްވުމަށް ހަމަޖެހިފައިވާކަމަށްވެސް އިސްލާމިލް މިނިސްޓްރީން ބުނެއެވެ.