ސްކޫލްކުދިންގެ 2ވަނަ ޤުރުއާން މުބާރާތް އަންނަ މާރޗް މަހު ބާއްވަން ނިންމައިފިއެވެ.
ކީރިތި ޤްރުއާނާބެހޭ މަރުކަޒުން ބުނީ ސްކޫލް ކުދިންގެ ޤްރުއާން މުބާރާތް ބާއްވަން ހަމަޖެހިފައިވަނީ އަންނަ މަރޗްމަހުގެ 24 ވަނަ ދުވަހުކަމަށެވެ.
މި މުބާރަތަކީ ކީރިތި ޤުރުއާނުގެ ފަންނު ދިރުވައި ތަޖުވީދުގެ ހަމަތަކާ އެއްގޮތަށް ޤުރުއާން ކިޔަވަން ދަންނަ ޖީލެއް ބިނާކުރެއްވުމަށްޓަކައި ކީރިތި ޤުރުއާނާބެހޭ މަރުކަޒުން މިނިސްޓްރީ އޮފް އެޑިޔުކޭޝަނާ ގުޅިވަޑައިގެން ބާއްވާ މުބާރާތެކެވެ.
މިދިޔަ އަހާރާ އެއްގޮތަށް މިއަހަރުގެ މުބާރާތްވެސް ވަނީ ތިން ގޮތްޕަކަށް ބަހާލާފައެވެ. އޭގެ ތެރޭގައި ފޮތުން ކިޔެވުމާއި، ހިތުން ކިޔެވުމުގެ އިތުރުން ހާފިޡުންގެ ގޮފި ހިމެނެއެވެ. މި ތިންގޮފި ތިން ބަޔަކަށް ބަހާލާފައިވާއިރު ބަލއިގެން ކިޔެވުމުގެ ބައިގައި ވިދިވިދިގެން 5 ފޮތާއި،10 ފޮތާއި 15 ފޮތުން ތަޖުވީދު ހަމަތަކަށް ކިޔެވުން ހިމެނެއެވެ. ހިތުން ކިޔެވުމުގެ ބައިގައި ހިމެނެނީ ވިދިވިދިގެން 2 ފޮތާއި، 4 ފޮތާއި، 6 ފޮތް ތަޖުވީދުގެ ހަމަތަކަށް ކިޔެވުމެވެ. އަދި ހާފިޡު ކަމުގެ ބައި މުޅި ޤުރުއާން ހިތުދަސްވެފައިވުމާއެކު ތަޖުވީދު ހަމަތަކުން ކިޔެވުން ހިމެނެއެވެ.
ކީރިތި ޤްރުއާނާ ބެހޭ މަރުކަޒުން ބުނީ އެޑިއުކޭޝަން މިނިސްޓްރީގައި ރަޖިސްޓްރީވެފައިވާ ކޮންމެ ސްކޫލަކަށް މި މުބާރާތުގައި ބައިވެރިވެވޭނެކަމަށެވެ.
މުބާރާތުން ބަލައިގެން ކިޔެވުމާއި ، ހިތުން ކިޔެވުމުގެ އިތުރުން ހާފިޡުކަމުގެ ގޮފިން އެންމެ މޮޅު 3 ދަރިވަރަކު ހޮވުމަށް ވަނީ ހަމަޖެހިފައެވެ. އަދި މުބާރާތުގެ ބަލައިގެން އަދި ހިތުން ކިޔެވުމުގެ ގޮފިން އެންމެ މޮޅު ތިން ސްކޫލެއް ހޮވުމަށް ހަމަޖެހިފައިވާކަމަށްވެސް ކީރިތި ޤްރުއާނާ ބެހޭ މަރުކަޒުން ބުނެއެވެ.
މި މުބާރާތުގައި ބައިވެރިވުމަށް އެދި ފޯމް ހުށައަޅަންޖެހޭ އެންމެ ފަހުގެ ތާރީޚަކީ އަންނަމަހުގެ 24 އެވެ.