މިދިޔަ އަހަރަކީ ޑެންގީގެ ނުރައްކާ ކުޑަ އަހަރެއް ކަމަށާއި މި އަހަރު އެއަށްވުރެ ކާމިޔާބު އަހަރަކަށް ހެދުމަށް އެންމެން ގުޅިގެން މަސައްކަތް ކުރުމަށް ހެލްތް މިނިސްޓަރ އަބްދުﷲ ނާޒިމް އިބްރާހީމް ގޮވާލައްވައިފިއެވެ. ޑެންގީން ރައްކާތެރިވުމަށް ޤައުމީ ފެންވަރުގައި މިއަދު ވަނީ ހާއްސަ ކެމްޕޭނެއް ފަށާފައެވެ.
އެޗްޕީއޭއާއި އެޗްޑީސީއާއި ޑަބްލިއުއެޗްއޯ ގުޅިގެން ޑެންގީން ރައްކާތެރިވުމަށް ޤައުމީ ފެންވަރުގައި ފެށި މި ކެމްޕޭނަކީ އެއްދުވަހުގެ މުއްދަތަށް ކުރިއަށްގެންދިޔަ ކެމްޕޭނެކެވެ. މި ކެމްޕޭން ފައްޓަވާ ދެއްވީ ހެލްތް މިނިސްޓަރ އަބްދުﷲ ނާޒިމް އިބްރާހީމްވެ. މި ހަރަކާތުގައި ސަރުކާރުގެ އޮފީސްތަކާއި އަމިއްލަ މުއައްސަސާތަކުން ވަނީ ބައިވެރިވެފައެވެ. ޤައުމީ ފެންވަރުގައި ފެށި ކެމްޕޭން ފައްޓަވާދެއްވާ ވާހަކަފުޅުދައްކަވަމުން ހެލްތް މިނިސްޓަރ އަބްދުﷲ ނާޒިމް އިބްރާހީމް ވިދާޅުވީ ވޭތުވެ ދިޔަ އަހަރަކީ ޑެންގީގެ މާބޮޑެތި ނުރާކާއެއްނެތި ދިޔަ އަހަރެއްކަމަށާއި، މިއަހަރުވެސް އެއަށްވުރެ ކާމިޔާބު އަހަރަކަށް ހެދުމަށް އެންމެންގެ އެއްބާރުލުން ބޭނުންވާކަމަށެވެ. އަދި މި ކެމްޕޭނަކީ ޑެންގީން ރައްކާތެރިވުމަށް ފެށި ވަރަށް މުހިއްމު ކެމްޕޭނެއްކަމަށާއި އަދި މި ކަމުގައި ފަރުދީ ގޮތުންނާއި ސަރުކާރުގެ މުއައްސަސާތަކުން އެބައެއްގެ ޒިންމާ އެންމެ ފުރިހަމައަށް އަދާކުރުމަށް މިނިސްޓަރ ނާޒިމް ގޮވާލެއްވިއެވެ.
"މަދިރީގެ ސަބަބުން ޖެހޭ ބަލިތަކަކީ އެ ޖެހުމުން ފުރާނައަށް ގެއްލުންވާ ބަލިތަކެއް. ޑެންގޫ،ޗިކަންގުންޔާ ފަދަ ބަލިތައް ހިމެނެއެވެ. އެހެންކަމުން މަދިރި ކޮންޓްރޯލް ކުރުމަކީ އެ ބަލިތަކުން ސަލާމަތްވުމަށް ކުރެވޭނެ އެއްކަންތައް.ސިނާއީ އަދި އިޤްތިޞާދީ ބައިވަރު މަސައްކަތްތައް ކުރެވެމުންދާއިރު މަދިރި އުފެދޭ ތަންތަން އުފެދިގެން ދޭ. ވުމާއެކު އެފަދަ ތަންތަން ނައްތާލުމަކީ މަދިރި ކޮންޓްރޯލް ކުރުމަށް ކުރެވޭ މުހިއްމުކަމެއް."ކަމަށް ހެލްތް މިނިސްޓަރ ވިދާޅުވިއެވެ.
އެޗްޕީއޭއިން ބުނީ މި ކެމްޕޭން ފެށުމަށް ނިންމީ ކޮންމެ އަހަރެއްގެ ޖެނުއަރީ މަހާ ދިމާކޮށް ޑެންގީގެ ކޭސްތައް ރާޢްޖޭގައި އިތުރުވަމުން އަންނާތީކަމަށެވެ. މި ޙަރަކާތުގައި މަދިރި އުފެދި އާލާވާ ފަދަ ތަންތަން ބަލާ އެފަދަ ތަންތަން ނައްތާލުމާއި ޑެންގީން ރައްކާތެރިވުމަށް ބޭނުންވާ މަޢުލޫމާތު ވަނީ ދީފައެވެ. މި ޙަރަކާތުގައި ހުޅުމާލޭގެ ސްކޫލްތަކުގައި މަދިރި އާލާވާ ފަދަތަންތަން ވަނީ ބަލާފައެވެ. މީގެ އިތުރުން ކޮންސްޓްރަކްޝަން ސައިޓްތަކާއި ޑެންގީގެ ކޭސްތައް ރިޕޯޓުކޮށްފައިވާ ސަރަޙައްދުތަކާއި މަދިރި އުފެދިދާނެކަމަށް ބެލެވޭ ތަންތަންވެސް ވަނީ ބަލާފައެވެ.