ލަސް ވޭގަސް ޓްރެވެލް އެޖެންޓް ފޯރަމް 2018 ގައި ރަޖިސްޓްރީވުމުގެ ފުރުސަތު މަޓާޓޯއިން ހުޅުވާލައިފިއެވެ. މަޓާޓޯއިން ބުނީ މި ފޯރަމްގައި ބައިވެރިވާން ބޭނުންވާ ރިސޯޓްތަކާއި، ހޮޓެލްތަކާއި އެއަރލައިންތަކާއި ޓްރެވެލް އެޖެންޓްތަކާއި ގެސްޓްހައުސްތަކަށް މިމަހުގެ ނިޔަލަށް އެ ފުރުސަތު ހުޅުވާލެވިފައިވާކަމަށެވެ.
މަޓާޓޯއިން ބުނީ ބައިވެރިވާން ބޭނުންވާ ކުންފުނިތަކުން އެކަމަށް އެދި ފޯމް ހުށައަޅާ ފީ ދެއްކުމުން ބައިވެރިވެވޭނެކަމަށެވެ. ރިސޯޓްތަކާއި، ހޮޓެލްތައް އަދި އެއަރލައިންތަކުން ފީގެ ގޮތުގައި ދައްކަންޖެހޭނީ 2،000 ޑޮލަރެވެ. އަދި ޓްރެވެލް އެޖެންޓްތަކާއި ގެސްޓްހައުސްތަކުން ދައްކަންޖެހޭނީ 1،500 ޑަލަރެވެ.
އަންނަ އެޕްރީލްމަހުގެ 8ން 10 އަކަށް ނެވައިޑައި ގެ ލަސް ވޭގަސްގައި އޮންނަ މި ފޯރަމަކީ މިދާއިރާގައި ހަރަކާތްތެރިވާ ކުންފުނިތައް އެއްތަނަކަކުން ބައްދަލުވާނެ ފޯރަމެކެވެ. ފޯރަމްގެ ތެރެއިން ދުނިޔޭގެ ބޮޑެތި މާކެޓްތައް ހޯދުމަށް ފުރުސަތު ފަހިވެގެންދާނެއެވެ. ތިން ދުވަހުގެ މުއްދަތަކަށް ކުރިއަށްދާ މި ފޯރަމްގައި ބީޓުބީ ހަރަކާތްތައްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މިދިޔަ އަހަރުގެ "ލަސް ވޭގަސް ޓްރެވެލް އެޖެންޓް ފޯރަމްގައި 43 ގައުމަކުން 1700 އަށްވުރެ ގިނަ ޓްރެވެލް އެޖެންޓުން ވަނީ ބައިވެރިވެފައެވެ.