ވަން ވޯލްޑް ޓްރެވެލް މާރޓް (އޯޓީއެމް) ގެ "ބެސްޓް ޑެކޮރޭޝަން ސްޓޭންޑް" ގެ އެވޯޑް ރާއްޖެއަށް ލިބިއްޖެއެވެ. މިމަހުގެ 18 އިން 20 އަށް އިންޑިއާގެ މުންބާއީގައި ކުރިއަށްދިޔަ މި ފެއަރއަކީ އިންޑިއާގައި ބާއްވާ މިފަދަ އެންމެ ބޮޑު ފެއަރއެވެ. ރާއްޖެއަށް ލިބުނު އެވޯޑާއި ހަވާލުވީ މި ފެއަރގައި ރާއްޖެ ތަމްސީލުކުރަމުންދާ މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ގެ ފަރާތުންނެވެ.
މި ފެއަރގައި އެމްއެމްޕީއާރުސީއާއިއެކު ރާއްޖޭގެ 15 ކުންފުންޏަކުން 23 ފަރާތެއްވަނީ ބައިވެރިވިއެވެ. މި ފެއަރގައި މައިގަނޑުގޮތެއްގައި އަމާޒުކޮށްފައިވަނީ އިންޑިއާގެ ފަތުރުވެރިން ރާއްޖެއަށް ޒިޔާރަތްކުރާ މިންވަރު އިތުރުކުރުމަށްކަމަށް އެމްއެމްޕީއާރުސީން މައުލޫމާތުދެއެވެ.
އިންޑިއާ ހިމެނެނީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ 5 ޤައުމުގެ ތެރޭގައެވެ. 2017 ވަނަ އަހަރު އިންޑިއާއިން ރާއްޖެއަށް 70 ހާހަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
ވަންވޯލްޑް ޓްރެވެލް މާރޓްގައި މިދިޔަ އަހަރު 60 ޤައުމަކުން 1300 ފަރާތެއް ވަނީ ބައިވެރިވެފައެވެ. 14،000 ފަރާތުން މިދިޔަ އަހަރުގެ ފެއަރ އަށް ޒިޔާރަތްކޮށްފައިވާއިރު މިއަހަރު މިއަދަދު އިތުރުވާނެކަމަށް ފެއަރ އިންތިޒާމްކުރާ ފަރާތުން އަންދާޒާކުރެއެވެ.