މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އިން ކ.ކާށިދޫގައި ތަރައްޤީކުރާ ޓޫރިސްޓް ވިލެޖްގެ ބިންގާ އަޅައިފިއެވެ. މިތަނުގެ ބިންގާ އަޅުއްވައިދެއްވީ ޓޫރިޒަމް މިނިސްޓަރ މޫސާ ޒަމީރެވެ.
މެދުފަންތީގެ ފަތުރުވެރިކަން ތަރައްޤީކުރުމަށް ސަރުކާރުން އުފައްދާފައިވާ ކުންފުނި އެމްއައިޓީޑީސީއިން ކާށިދޫގައި ތަރައްޤީކުރާ ގެސްޓްހައުސްތަކުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ 2 ފިޔަވައްސަކަށް ބަހާލައިގެންނެވެ. މި މަސްރޫޢުގެ ފުރަތަމަ ފިޔަވަހީގައި 60 އެނދުގެ 3 ގެސްޓްހައުސް ތަރައްޤީކުރުމަށް ވަނީ ނިންމާފައެވެ.
"ކާށިދޫ ޓޫރިސްޓް ވިލެޖް"ގެ ބިންގާއެޅުމުގެ ރަސްމިއްޔާތުގައި ވާހަކަފުޅުދައްކަވަމުން ޓޫރިޒަމް މިނިސްޓަރ މޫސާ ޒަމީރު ވިދާޅުވީ ސަރުކާރުގެ އަމާޒަކީ މިއަހަރުގެ ފަތުރުވެރިކަމުގެ ސީޒަނުގައި ކާށިދޫގެ ރައްޔިތުންނަށް ފަތުރުވެރިކަމުގެ ދާއިރާއިން ފައިދާވާނެގޮތް ހެދުންކަމަށެވެ. ހަމަސްދުވަހުގެ ތެރޭގައި މި މަޝްރޫޢުގެ މަސައްކަތް ނިންމުމަށް އަމާޒު ހިފާފައިވާކަމަށް މިނިސްޓަރ ވިދާޅުވިއެވެ. އަދި މި ޕްރޮޖެކްޓް ފަށައިގަތުމުން ރަށުގައި ހުރި ތަރައްޤީގެ އެހެނިހެން މަޝްރޫޢުތައްވެސް ބާރު ދުވެލީގައި ކުރިއަށްދާނެކަން މިނިސްޓަރ ފާހަގަކުރެއްވިއެވެ.
"އަޅުގަނޑުމެން އިރާދަކުރެއްވިއްޔާ ޖުލައިމަސް ނިމިގެންދާއިރަށް އަޅުގަނޑުމެން ބަލާނީ މަސައްކަތް ނިންމަން. މިއަހަރުގެ ރާއްޖޭގެ ސީޒަންވާނީ މިރަށަށް ޓޫރިސްޓުން އައިސްގެން މިރަށު ޒުވާނުންނަށާއި އަދި މިރަށުގެ ރައްޔިތުންނަށް ވިޔަފާރީގެ ފައިދާ ކޮންމެވެސް ވަރަކަށް ލިބިގެންދާނެ އަހަރެއްގެ ގޮތުގަ." މިނިސްޓަރ ޒަމީރު ވިދާޅުވިއެވެ.
އެމްއައިޓީޑީސީއިން "ކާށިދޫ ޓޫރިސްޓް ވިލެޖް" މަޝްރޫއު ޕްލޭންކޮށްފައިވަނީ ބޭރުން "ޕްރީފެބް" ބިލްޑިންގްތައް ގެނެސް ރާވާލާ ގޮތަށެވެ. މި ޕްރޮޖެކްޓާއި ބެހޭގޮތުން މަޢުލޫމާތު ދެމުން އެއްއައިޓީޑީސީގެ މެނޭޖިންގ ޑިރެކްޓަރ މުޙައްމަދު ޝާހިދު ވިދާޅުވީ މި މަޝްރޫގެ ފައުންޑޭޝަން މަސައްކަތް ކުރިއަށްއޮތް ދެތިން ދުވަހުގެ ތެރޭގައި ފަށާނެކަމަށެވެ. އަދި 6 މަސްދުވަހުގެ ތެރޭގައި މި މަސައްކަތް ނިންމާލުމަށްފަހު މާކެޓަށް ހުޅުވާލާނެކަމަށެވެ. އަދި މިތަން ނިމޭއިރު ވޯޓަރ ސްޕޯޓްސްފަދަ ކުޅިވަރުތައް ކުޅެވޭނެ އިންތިޒާމްވެސް ހަމަޖެހިގެންދާނެކަމަށެވެ.
"މި ޕްރޮޖެކްޓް ފެއްޓިފަ މިއިންނަނީ ސަރުކާރުން ދީފައިންނަ ސީޓްސް ފަންޑުން. ނަމަވެސް އަޅުގަނޑުމެންގެ ލޯންގ ޓާރމް ޕްލޭންއަކީ މި ބިލްޑިންގތައް މިކަން އޮޕަރޭޓްކުރަންބޭނުންވާ މީހުންނަށް ވިއްކާލުން." މުޙައްމަދު ޝާހިދު ވިދާޅުވިއެވެ.
އެއްއައިޓީޑީސީން މި ޕްރޮޖެކްޓްގެ މަސައްކަތް ކުރިއަށްގެންދަނީ ސަރުކާރުން ދޫކޮށްފައިވާ ލޯނެއްގެ ދަށުންނެވެ. "ކާށިދޫ ޓޫރިސްޓް ވިލެޖް" އެއްކޮން ތަރައްޤީކޮށް ނިމޭއިރު މިތަނުގައި 250 ކޮޓަރި ހުންނާނެކަމަށް އެ ކުންފުނިން ބުނެއެވެ. އަދި މި ބިލްޑިންގތައް ތިން ލައްކަ ޑޮލަރަށްވުރެ ހެޔޮ އަގެއްގައި ވިއްކާލުމަށް ނިންމާފައިވާކަމަށްވެސް އެ ކުންފުނިން މައުލޫމާތުދެއެވެ.