ރާއްޖޭގެ ފަތުރުވެރިކަން އިސްތިހާރުކުރުމަށް މަޓާޓޯއިން މުމްބާއީގައި ޚާއްޞަ އިވެންޓެއް ބާއްވަނީ

ރާއްޖޭގެ ފަތުރުވެރިކަން އިސްތިހާރު ކުރުމަށް އިންޑިޔާގެ މާކެޓަށް ޙާއްސަކޮށްގެން މޯލްޑިވިއަން ނައިޓްގެ ނަމުގައި ޚާއްޞަ ޙަރަކާތެއް ބޭއްވުމަށް ރާވާފައިވާކަމަށް މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އިން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެމުން މަޓާޓޯގެ ޑެޕިއުޓީ ސެކްރެޓަރީ ޖެނެރަލް އަސްރާ ނަސީމް ވިދާޅުވީ އިންޑިއާގެ މާކެޓަކީ ރާއްޖެއަށް ވަރަށް މުހިންމު މާކެޓެއްކަމަށެވެ. އެހެންކަމުން ރާއްޖެ އިސްތިހާރު ކުރުމަށް "މޯލްޑިވިއަން ނައިޓު"ގެ ނަމުގައި މިއަހަރުގެ މޭމަހުގެ ތެރޭގައި މުންބާއީގައި ޚާއްޞަ އިވެންޓެއް ބާއްވާނެކަމަށެވެ. މި އިވެންޓްގައި ބައިވެރިވުމުގެ ފުރުޞަތު ރާއްޖޭގެ 10 ރިސޯޓަކަށް ދިނުމަށް ހަމަޖެހިފައިވާކަމަށާއި، އިވެންޓުގައި މުންބާއީގެ އެންމެ ވަރުގަދަ 150 ޓްރެވެލް އެޖެންޓުންވެސް ބައިވެރިވާނެކަމަށް އަސްރާ ވިދާޅުވިއެވެ. އަސްރާ ވިދާޅުވީ މި އިވެންޓްގެ ތެރެއިން ނެޓްވޯކިންގ ފުރުޞަތުތަކާއި، ރާއްޖެ ޝޯކޭސް ކުރުމުގެ ފުރުސަތުވެސް ލިބިގެންދާނެކަމަށެވެ.

"

"ވަރަށް ލިމިޓެޑް އެކްސްކުލޫސިވް އިވެންޓެއް މިއީ. 10 ރިސޯޓް ޕާޓްނަރުންނަށް ހުޅުވާމިލަނީ. ދެންހަމަ އަޅުގަނޑުމެން މި އިވެންޓަށް އެބަ ގެންނަން އިންޑިއާގެ މުންބާއި ބޭސްޑް ޓޮޕް 150 ޓްރެވެލް އެޖެންޓްސް. ދެން އެމީހުންނާއިއެކު ނެޓްވޯކިންގ ފުރުސަތާއި، އަދި ރާއްޖެ ޝޯކޭސް ކުރުމުގެ ފުރުސަތު ލިބިގެންދާނެ."

އަސްރާ ނަސީމް ވިދާޅުވިއެވެ.

ރާއްޖޭގެ ފަތުރުވެރިކަން އިސްތިހާރު ކުރުމަށް މަޓާޓޯއިން އަންނަނީ ރާއްޖެއިން ބޭރުގައި ރޯޑުޝޯވްތައްފަދަ އެކި ޙަރަކާތްތައް ބާއްވަމުންނެވެ.
މިއަހަރުގެ ޖެނުއަރީ މަހާއި ފެބަރުއަރީ މަހުގެ ތެރޭގައި އިންޑިއާއިން ރާއްޖެއަށް ސާދަހާސް ފަސްސަތޭކަ ނަވާރަ ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މިމުއްދަތާ އަޅާބަލާއިރު ނަވާފަ ޕޮއިންޓު ފަހެއް 19.5 އިންސައްތައިގެ ކުރިއެރުމެކެވެ.