ރާއްޖޭގެ ފަތުރުވެރިކަމުގެ ދާއިރާގައި ޙަރަކތްތެރިވާ 9 ކުންފުންޏެއްގެ 16 ބައިވެރިންނާއެކު މި އަހަރުގެ "ޗައިނާ އައުޓްބައުންޑް ޓްރެވަލް އެންޑް ޓޫރިޒަމް މާކެޓް" ކޮޓުމް ފެއަރ ނިމިއްޖެއެވެ. މިއަހަރުވެސް ކޮޓުމް ފެއަރގެ ރާއްޖޭގެ ސްޓޭންޑަށް ބޮޑު ތަރުޙީބެއް ވަނީ ލިބިފައެވެ.
ތިން ދުވަހުގެ މުއްދަތަކަށް ޗައިނާ ނޭޝަނަލް އެގްރިކަލްޗަރަލް އެގްޒިބިޝަން ސެންޓަރގައި ކުރިއަށްދިޔަ މިއަހަރުގެ "ޗައިނާ އައުޓްބައުންޑް ޓްރެވަލް އެންޑް ޓޫރިޒަމް މަރކެޓް" ކޮޓުމް ފެއަރއަކީ ޗައިނާގައި ބާއްވާ މިފަދަ އެންމެ ބޮޑު ފެއަރތަކުގެ ތެރޭގައި ހިމެނޭ ފެއަރއެކެވެ.
މިއަހަރުގެ ފެއަރގައި 60އަށް ވުރެ ގިނަ ޤައުމުން 450 ހެއްހައި އެގްޒިބިޓަރުން ބައިވެރިވެފައިވެއެވެ.
މިއަހަރުގެ ކޮޓުމް ފެއަރއާ ގުޅޭގޮތުން ޕީއެސްއެމް ނިއުސްއާ ވާހަކަދައްކަވަމުން އެމްއެމްޕީއާރުސީގެ ޑެޕިއުޓީ ޗީފް މާރކެޓިންގ އޮފިސަރ ފާޠިމަތު އަފްރާ ވިދާޅުވީ މިއަހަރުގެ ފެއަރގެ ތެރެއިން ޗައިނާގެ ޓުއަރ އޮޕަރޭޓަރުންނާއެކު ކާމިޔާބު ބައްދަލުވުންތަކެއް ބޭއްވިކަމަށެވެ.
"އަޅުގަނޑުމެންނަށް ލިބުނު ފީޑް ބެކަށް ބަލާއިރު ވަރަށް ރަގަޅުކަމަށް ފެންނަނީ. ޓުއަރ އޮޕަރޭޓަރުންވެސް ވަރަށް އިންޓްރެސްޓް އެބަހުރި، ކުރިއަށް އޮތްތާގައި މަރކެޓް އިތުރަށް ރަގަޅު ވާނެ ކަމަށް ވާހަކަދެއްކި ފަރާތްތަކުން ވިދާޅުވީ، ދެން އޭގެ އިތުރުން އަޅުގަނޑުމެންނާއި އެއްކޮށް މިކޮޅުގައި ބައިވެރިވި އިންޑަސްޓްރީ ޕާޓްނަރުންގެ ފަރާތުން ލިބުނު ފީޑް ބެކްއަށް ބަލާއިރުވެސް ހަމަ ފުދޭ ވަރަކަށް ރަގަޅު ކޮލިޓީގެ ބަޔާސްއާ ބައްދަލުވެ ރަގަޅު މީޓީންގްތަކެއް ކުރިއަށް ދިޔަ"
އަފްރާ ވިދާޅުވިއެވެ.
ކޮޓުމްފެއަރގައި ބައިވެރިވި ދިވެހި ކުންފުނިތަކުންވެސް ބުނީ ފެއަރތެރެއިން ޗައިނާގެ ޓުއަރ އޮޕަރޭޓަރުންނާ ބައްދަލުވެ، ރަގަޅު ކުރިއެރުންތަކެއް ލިބިފައިވާ ކަމަށެވެ.
މިދިޔަ އަހަރުގެ ކޮޓުމް ފެއަރއަށް ޗައިނާގެ ހަތަރު ހާސް ތިންސަތޭކައަށްވުރެ ގިނަ ޓްރެވަލް އެޖެންޓުން ވަނީ ޒިޔާރަތްކޮށްފައެވެ. މިއީ 2016 ވަނަ އަހަރާ އަޅާ ބަލާއިރު %18 އިތުރު ޢަދަދެކެވެ.