ޕީއެސްއެމްއިން ގެނެސްދޭ އެންމެ އަލިގަދަ ތަރި ޖޫނިއާގެ އޮޑިޝަންތައް މިރޭ ޓީވީއެމްއިން ދައްކަން ފަށާނެއެވެ.
މިރޭ 9:30 ގައި ދެއްކުމަށް ހަމަޖެހިފައިވަނީ މާލެއާއި އަތޮޅުތެރެއިން މުބާރާތައް ކުދިން ނެގުމަށް ކުރިއަށް ގެންދިޔަ އޮޑިޝަންތަކެވެ. މި މުބަރާތުގެ ކިޔެވުންތައް ޓީވީއެމްއިން ދެއްކުމަށް ހަމަޖެހިފައިވަނީ ކޮންމެ ހަފްތާއެއްގެ ބުދަ އަދި ހޮނިހިރު މި ދެ ދުވަހުއެވެ. މި މުބާރާތް ޕީއެސްއެމްގެ މުންނާރު ޓީވީއިންވެސް ދައްކާނެއެވެ.
މުޅި ރާއްޖެއަށް ހުޅުވާލައިގެން ކުރިއަގެންދާ މިމުބާރާތުގެ އޮޑިޝަންތަކުގައި ތިންސަތޭކަ ތިރީސް ހަ ކުދިން ބައިވެރިވެފައިވެއެވެ.
މުބާރާތުގެ އޮޑިޝަންތައް ކުރިއަށް ގެންގޮސްފައިވަނީ މާލޭގެ އިތުރުން ޅ.ނައިފަރާއި ހއ.ދިއްދޫއާއި އައްޑޫ ސިޓީގައެވެ. މިމުބާރާތަކީ ކީރިތި ޤުރުއާނާއި ޤުރުއާނުގެ ޢިލްމާއި ތަޖުވީދުގެ ހަމަތަކާއެކޮށް ކިޔެވުމުގެ ވާދަވެރިކަން ކުދިންގެ މެދުގައި އުފައްދާ ކީރިތި ޤުރުޢާނަށް ޝަޢުގުވެރިވާ ޖީލެއް ބިނާކުރުމަށް ޕީއެސްއެމުން ކުރިއަށްގެންދާ މުބާރާތެކެވެ.
ޢުމުރުން އަށް އަހަރާއި ސޯޅަ އަހަރާއި ދެމެދުގެ ޢުމުރުފުރާއަށް ހުޅުވާލައިގެން ކުރިއަށްގެންދާ މި މުބާރާތުން އެއްވަނަ އަށް ހޮވޭ ކުއްޖަކަށް 300،000ރ (ތިން ސަތޭކަ ހާސް ރުފިޔާ)ގެ އިނާމެއް ދިނުމަށްވަނީ ހަމަޖެހިފައެވެ. ދެވަނައަށް 100،000ރ( ސަތޭކަ ހާސް ރުފިޔާ)ގެ އަދި ތިންވަނައަށް 50،000ރ (ފަންސާސް ހާސް ރުފިޔާ)ގެ ފައިސާގެ އިނާމެއް ދިނުމަށް ވަނީ ހަމަޖެހިފައިފައެވެ.