ކުދި ވިޔަފާރިތަކާއި މެދުފަންތީގެ ވިޔަފާރި ކުރިއެރުވުމަށް މާލީ އެހީތެރިކަން ފޯރުކޮށްދިނުމަށް ސަރުކާރުން ދެމުންދާ ލޯނު ސްކީމް، އެސްއެމްއީ ލޯނަށް އެދި 700 އަށް ވުރެ ގިނަ މީހުން ފޯމް ހުށައަޅާފައިވާކަމަށް އިކޮނަމިކް މިނިސްޓްރީން ބުނެފިއެވެ.
އެސްއެމްއީ ލޯން ސްކީމްގެ ދަށުން ޖުމްލަ ފަންސާސް މިލިއަން ރުފިޔާގެ ލޯނު ދޫކުރުމަށް ހަމަޖެހިފައިވާކަމަށް އިކޮނޮމިކް މިނިސްޓްރީން ބުނެއެވެ. މި ސްކީމްގެ ދަށުން ލޯނު ލިބޭނެ އެންމެ މަތީ ޢަދަދަކީ ވަކި ފަރުދަކު ކުރާ ވިޔަފާރިއެއްނަމަ ފަސް ލައްކަ ރުފިޔާއެވެ. އަދި ޕާރޓްނަޝިޕް ކުންފުނި ނުވަތަ ކޯޕަރޭޓް ސޮސައިޓީއެއްނަމަ އެއްމިލިއަން ފަސްސަތޭކަ ހާސް ރުފިޔާއެވެ.
އިކޮނަމިކް މިނިސްޓްރީން ބުނީ އެސްއެމްއީ ލޯން ސްކީމަށް 700 އަށް ވުރެ ގިނަ ފޯމް ލިބިފައިވާއިރު މިހާރު ކުރިއަށްދަނީ ފޯމްތައް އިވެލުއޭޓް ކުރުމުގެ މަސައްކަތްކަމަށެވެ. އަދި ތާވަލާ އެއްގޮތަށް މަސައްކަތްކުރިއަށްދާނަމަ މިމަހުގެ ނިޔަލަށް އިވެލުއޭޓްކުރުމުގެ މަސައްކަތްވެސް ނިންމާލެވޭނެކަމަށް އެ މިނިސްޓްރީން ބުނެއެވެ.
އެސްއެމްއީ ލޯނު ސްކީމްގެ ދަށުން ޖުމްލަ 8 ދާއިރާއަކުން މިއަހަރު ލޯނު ދޫކުރުމަށް ވަނީ ހަމަޖެހިފައެވެ. އޭގެ ތެރޭގައި ފަތުރުވެރިކަމުގެ ދާއިރާއާއި، ދަތުރުފަތުރުކުރުމުގެ ދާއިރާއާއި، ޢިމާރާތްކުރުމުގެ ދާއިރާ ހިމެނެއެވެ. މީގެ އިތުރުން ދަނޑުވެރިކަމާއި މަސްވެރިކަމުގެ ދާއިރާއާއި، ކޯޕަރޭޓިވް ސޮސައިޓީގެ ދާއިރާއާއި، ޚިދުމަތް ފޯރިކޮށްދިނުމުގެ ދާއިރާގެ އިތުރުން ވޭސްޓް މެނޭޖްމަންޓް ދާއިރާ އާއި އޯޕަން ކެޓަގަރީގެ ދާއިރާ ހިމެނެއެވެ.
މިދިޔަ އަހަރު އެސްއެމްއީ ލޯނުގެ ގޮތުގައި 38 މިލިއަން ރުފިޔާ އިކޮނޮމިކް މިނިސްޓްރީން ވަނީ ދޫކޮށްފައެވެ. އެސްއެމްއީ ލޯނު ސަރުކާރަށް އަނބުރާ ދެއްކުމަށް ނުވަ އަހަރުގެ މުއްދަތެއް ލިބޭނެއެވެ.