މިއަހަރުގެ ފިޠުރު ޢީދު ދުވަސް ފާހަގަކުރުމަށްޓަކައި ކުޑަކުދިންނަށް ޚާއްސަކޮށްގެން ޙަރަކާތްތަކެއް ކުރިއަށްގެންދިޔުމަށް އެން-ރޭންޖުން ނިންމައިފިއެވެ.
"ލިޔެލާ ރިޓްރީޓް ފެސްޓިވަލް"ގެ ނަމުގައި ކުރިއަށްގެންދިޔުމަށް ހަމަޖެހިފައިވާ މި ޙަރަކާތަކީ އުމުރުން 13 އަހަރުން ދަށުގެ ކުޑަކުދިންނަށް ޚާއްޞަކޮށްގެން ކުރިއަށްގެންދާ ޙަރަކާތެކެވެ. މިގޮތުން ޢީދުދުވަހު މި ޙަރަކާތްތައް ފެށުމުގެ ގޮތުން މާދަމާ ހެނދުނު ހެންވޭރު ދަނޑުގައި ޢީދު ނަމާދަށް ދިޔުމަށްޓަކައި ކުޑަކުދިންންނަށް، މުސައްލަ ބެހުމަށް ހަމަޖެހިފައިވާކަމަށް އެންރޭންޖުން ބުނެއެވެ. ޢީދު ނަމާދަށްފަހު ހެނދުނު 8:30އިން 11:30 އަށް ފެންކުޅީގެ ޙަރަކާތްތައް ކުރިއަށްގެންދިޔުމަށް ހަމަޖެހިފައިވެއެވެ.
މިޙަރަކާތް ކުރިއަށްގެންދިޔުމަށް ހަމަޖެހިފައިވަނީ ފެންބަޑި ބޭނުންކޮށްގެންނެވެ. އެން-ރޭންޖުން ބުނީ މިޙަރާކަތުގައި ބައިވެރިވުމަށް ކޮންމެ ކުއްޖަކުވެސް ފެންބަޑިއެއް ގެންނަންޖެހޭނެކަމަށާ ހެންވޭރު ދަނޑުންވެސް ބަޑި ގަންނަން ލިބެން ހުންނާނެކަމަށެވެ. އެހެންނަމަވެސް މި ޙަރަކާތުގައި ކުލަޖެހުމުގެ ފުރުޞަތު ނުދޭނޭކަމަށް އެފަރާތުން ބުނެއެވެ.
މީގެ އިތުރުން މެންދުރު 2:00 އިން އިރު އޮއްސި 6:00 އަށް "ނާރފް ބެޓަލް" މި ގޭމް ކުރިއަށްގެންދިޔުމަށް ހަމަޖެހިފައިވާކަމަށާއި، މި ގޭމުގައި މުޅިން ހިލޭ ބައިވެރިވެވޭނެކަމަށް އެން-ރޭންޖުން މި ހަރަކާތްތަކުގައި މަޤްބޫލް ކާރޓޫން ކެރެކްޓާރތައް ފެނިގެންދާނެއެވެ. އެންރޭންޖުން ބުނެއެވެ. މިދިޔަ އަހަރުވެސް ފިޠުރު ޢިދާދިމާކޮށް އެން-ރޭންޖުން މިފަދަ ޙަރަކާތްތަކެއް ކުރިއަށް ގެންގޮސްފައިވެއެވެ.
ޢީދުދުވަހުގެ މި ޙަރަކާތްތަކުގެ ކޯ-ސްޕޮންސަރ އަކީ އެސްޓީއޯ، މޯލްޑިވްސް ގޭސް އަދި ގިފްޓް އޮފް ލަވްއެވެ. މީޑިއާ ޕާރޓްނަރަކީ ޕަބްލިކް ސަރިވސް މީޑިއާ ޕީއެސްއެމްއެވެ.