ރާއްޖޭގައި ފުރަތަމަ ފަހަރަށް ފަށާ، އެމްބީބީއެސް ނުވަތަ ޑޮކްޓަރީކަމުގެ ކޯހަށް 60 އަށްވުރެ ގިނަ ދަރިވަރުން ކުރިމަތިލާފައިވާ ކަމަށް މޯލްޑިވްސް ނޭޝަނަލް ޔުނިވަރސިޓީ، އެމްއެންޔޫއިން ބުނެފިއެވެ.
ޑޮކްޓަރީކަން ކިޔަވަން އެދުމުގެ ފުރުޞަތު މިދިޔަ ބުރަސްފަތި ދުވަހު ހަމަވިއިރު 65 ދަރިވަރުން ވަނީ ކުރިމަތިލާފައެވެ. ކުރިމަތިލި ދަރިވަރުންގެ ފޯމުތައް މިހާރު ޗެކުކުރަމުން އަންނަ ކަމަށް އެމްއެންޔޫއިން ބުނެއެވެ. އަދި ކޯހަށް ވަނުމުގެ މުއްދަތު ހަމަވިނަމަވެސް، ކޯހުގައި ބައިވެރިވުމުގެ ފުރުޞަތު އަދިވެސް އެބައޮތް ކަމަށް އެމްއެންޔޫއިން ބުނެއެވެ. ރާއްޖޭގައި ފުރަތަމަ ފަހަރަށް ފަށާ ޑޮކްޓަރީ ކަމުގެ ކޯހުގެ ފުރަތަމަ ބެޗްގައި 50 ދަރިވަރުންނަށް ޖާގަ ދިނުމަށް ހަމަޖެހިފައިވެއެވެ.
ކޯހުން ޖާގަ ދިނުމުގައި އިސްކަންދިނުމަށް ހަމަޖެހިފައިވަނީ ކޯހަށް ކުރިމަތިލާ ތަރުތީބުން، ޝަރުތު ހަމަވާ ދަރިވަރުންނަށެވެ. ކޯހަށް ކުރިމަތިލެވޭނީ އޭލެވެލްގައި ބައޮލޮޖީއާއި ކެމިސްޓްރީއާއި ހިސާބު ހިމެނޭގޮތަށް މަދުވެގެން ފަސް މާއްދާއިން ފާސްވެފައިވާ ދަރިވަރުންނަށެވެ. އަދި އިނގިރޭސި މާއްދާއިން ދަށްވެގެން ސީ ފާސް އޮންނަންޖެހެއެވެ. 5 އަހަރުދުވަހުގެ މުއްދަތަށް ހިންގާ މި ކޯހުގެ ފީގެ ގޮތުގައި ކަނޑައަޅާފައިވަނީ މަހަކު ގާތްގަނޑަކަށް 1000 ޑޮލަރެވެ. ކޯހުގައި ބައިވެރިވާން ބޭނުންވާ ޒުވާނުންނަށް ޚާއްޞަކޮށްގެން ހަޔަރ އެޑިއުކޭޝަނުން ވަނީ ޚާއްޞަ ލޯނެއް ތަޢާރަފުކޮށްފައެވެ.
ރާއްޖޭގައި ޤާއިމުކުރާ ފުރަތަމަ މެޑިކަލް ކޮލެޖް ޤާއިމުކުރުމަށް ހަމަޖެހިފައިވަނީ އަލަށް އިމާރާތްކުރާ 25 ބުރީގެ ދަރުމަވަންތަ ހޮސްޕިޓަލްގައެވެ. އެ އިމާރާތުގެ 2 ބުރި މެޑިކަލް ކޮލެޖަށް ވަނީ ޚާއްޞަކޮށްފައެވެ.