އިންކުލޫސިވް އެޑިއުކޭޝަން ނުވަތަ ހުރިހާ ދަރިވަރުންގެ ބައިވެރިވުމާއެކު ކިޔަވައިދިނުމާގުޅޭ ތަމްރީނުތަކެއް ދިނުމަށް ޚާއްޞަ ސެމިނަރެއް ފަށައިފިއެވެ.
"ސްޓްރެންތެނިންގ އިންކުލޫސިވް އެޑިއުކެޝަން، ޑިވެލޮޕިން އަ ކޯޗިން ފްރޭމް ވޯރކް"ގެ ނަމުގައި ކުރިއަށްގެންދާ މި ސެމިނަރ އަކީ އޮސްޓްރޭލިޔާގެ ކުއީންސްލޭންޑް ޔުނިވަރސިޓީ އޮފް ޓޭކްނޮލޮޖީ އާއި ނެޝނަލް އިންސްޓްޓިއުޓް އޮފް އެޑިއުކޭޝަން އާ ގުޅިގެން ހިންގާ ސެމިނަރއެކެވެ. މި ސެމިނަރ ކުރިއަށްދާނީ ދެ ދުވަހުގެ މުއްދަތައް ކަމަށް ނެޝަނަލް އިންސްޓްޓިއުޓް އޮފް އެޑިއުކެޝަން އިން ބުނެއެވެ.
މި ސެމިނަރ އަކީ އޮސްޓްރޭލިއާ ސަރުކާރުގެ ހިލޭ އެހީގެދަށުން އޮސްޓްރޭލިޔާ އެވޯރޑްސް ފެލޯޝިޕްގައި، އެންއައިއީގެ 15 މުވައްޒަފަކަށް އިންކްލޫސިވް އެޑިއުކޭޝަންގެ ތަމްރީންތަކެއް ދިނުމަށްފަހު އެ މީހުން ބޭނުންކޮށް އިތުރު ކޯޗުން ތަކެއް ތަމްރީން ކުރުމަށް ހިންގާ ސެމިނައަރއެކެވެ.
އެން.އައި.އީ އިން ބުނީ މި ސެމިނަރއަށްފަހު މުސްތަޤްބަލުގައި ރާއްޖެގެ ސްކޫލުތަކުގައި އިންކުލޫސިވް އެޑިއުކޭޝަން ރަނގަޅުފެންވަރެއްގައި ކުރިއަށްގެންދިޔުމަށް އިތުރު ކޯޗުން ތަމްރީން ކޮށް ބޭނުންކުރާނެކަމަށެވެ.
މި ސެމިނަރގައި މިހާރު އެކުލަވާލާފައިވާ އިންކްލޫސިވް އެޑިއުކޭޝަން ޕޮލިސީއަށް ގެންނަންޖެހޭ ބަދަލުތަކާމެދު ތަޖުރިބާކާރުންނާއެކު މަޝްވަރާކޮށް ބައިވެރިންގެ ޚިޔާލާއި ތަޖުރިބާގެ އަލީގައި ގެންނަންޖެހޭ ބަދަލުތަކާމެދުވެސް މަޝްވަރާކުރުމަށް ވަނީ ހަމަޖެހިފައެވެ. އަދި ސެމިނަރގައި އިންކުލޫސިވް ކޯޗިން ފްރޭމްވޯކަށް މަޝްވަރާކޮށް އެއަށް އަމަލުކުރަން ފެށުމަށްވެސް ހަމަޖެހިފައިވެއެވެ.
މި ސެމިނަރ ފެށުމަށް ބެއްވި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އަޙްމަދު ޝަފީޢު ވިދާޅުވީ ތަޢުލީމީ ދާއިރާގައި އެއްވެސް ކުއްޖަކު ބާކީނުކުރާ ސިޔާސަތެއް ކަނޑައަޅާ ކިޔަވައިދެމުންދާއިރު އިންކުލޫސިވް އެޑިއުކޭޝަން ޕޮލިސީއެއް ކަނޑައަޅާ އޭގެސަބަބުން މިއަދު ފައިދާތަކެއްކޮށް އެކަމުގެ އަގުހުރި ނަތީޖާތަކެއް ފެންނަމުންދާކަމަށެވެ.
މިގޮތުން އެކި ކުދިންނަށް ޚާއްސަކޮށްގެން ތަފާތު ޕްރޮގްރާމްތައް ކުރިއަށްގެންދާކަން ފާހަގަކުރެއްވިއެވެ. މިނިސްޓާރ ވިދާޅުވީ އިންކުލޫސިވް އެޑިއުކެޝަންގެ ސަބަބުން ހަމައެކިނި ފައިދާ ކުރަނީ ނުކުޅެދުންތެރިކަން ނުވަތަ ޚާއްސަ އެހީއަށްބޭނުންވާ ކުދިންނަށް އެކަނި ނޫންކަމަށާއި އެކަމުގެ ސަބަބުން އެހެން ހުރިހާ ދަރިވަރުންނަށްވެސް އެކަމުގެ ފައިދާތައް ކުރާކަމަށެވެ. މިފަދަ ކުދިންނަށް ކިޔަވައިދެއްވުމަށް ޚާއްޞަ މުދައްރިސުން ތަމްރީންކޮށްފައިވާކަންވެސް ޝަފީޢު ފާހަގަކުރެއްވިއެވެ.
ޕީއެސްއެމް ނުއުސްއަށް މަޢުލޫމާތު ދެއްވަމުން އެޑިއުކެޝަން ޑިވެލޮޕްމެންޓް އޮފިސަރ ކޯރޑިނެޓަރ ޝަހިދާ ރިޒްވާން ވިދާޅުވީ މި ސެމިނަރގެ ސަބަބުން ރާއްޖޭގައި މިހާރަށްވުރެ ބޮޑަށް ޚާއްސައެހީއަށްބޭނުންވާ ކުދިންނަށް އަޅާލުން ބޮޑުވެގެންދާނެއެވެ. އަދި ރާއްޖޭގެ ރައްޔިތުންނަކީ އިންސާނުންގެ ކިބައިގައި ހުންނަ ތަފާތުތައް ބަލައިގަނެ ތަފާތުތަކަށް މަލާމާތް ނުކޮށް އެކުގައި އުޅޭނެބަޔަކަށް ވެގެންދާނެކަމަށެވެ.
މި ސެމިނަރގައި ވާހަކަދައްވަމުން ކުއީންސްލޭންޑް ޔުނިވަރސިޓީ އޮފް ޓެކްނޮލަޖީ ގެ އިންޓަރނޭޝަނަލް ޕްރޮޖެކްޓް ޑިރެކްޓަރ ނެލްސަން ސަލަންގްސަން ވަނީ ތަޢުލީމީދާއިރާގއި ރާއްޖެއިން ހޯދާފައިވާ ކާމިޔާބުތަކައް ތަޢުރީގްކޮށްފައެވެ. ޚާއްސަކޮށް އެންމެ ކުއްޖަކު ބާކީނުކޮށް ކިޔަވައިދިނުމުގެ ތެރެއިން އިންކުލޫސިވް އެޑިއުކޭޝަން ތަޢާރަފްކޮށް އެފަދަކުދިންނަށް ކިޔަވައިދެމުންދާތީ އެކަމަށް ތަޢުރީފްކުރެއްވިއެވެ.
މި ސެމިނަރގައި އޮސްޓްރޭލިޔާ ސަރުކާރުން ވަނީ އިންކުލޫސިވް އެޑިއުކެޝަންއާ ގުޅޭ ފޮތްތަކެއް އެޑިއުކޭޝަން މިނިސްޓްރީއަށް ހަދިޔާކުރައްވާފައެވެ. މި ސެމިނަރގައި ރާއްޖޭގެ އެކި އަތޮޅުތަކުންނާއި ކޮލެޖް، ޔުނިވަރސިޓީ ތަކުން ގާތްގަނޑަކަށް 70 މީހުން ބައިވެރިވެފައިވެއެވެ.