އިސްރާއީލުން ފަލަސްތީނުގެ ޣައްޒާއަށް ދެމުންދާ ލާއިންސާނީ ހަމަލާތައް ކުށްވެރިކޮށް އެ ހަމަލާތައް ހުއްޓާލުމަށް ރައްޔިތުންގެ މަޖިލީހުގެ ރައީސް އަބްދުﷲ މަސީޙް މުހައްމަދު ގޮވާލައްވައިފިއެވެ. މަޖިލީހުގެ ރައީސް މިގޮތަށް ގޮވާލައްވާފައިވަނީ، ބަރަކާތްތެރި ފިތުރު އީދުގެ މުނާސަބަތުގައި ފޮނުއްވި ތަހުނިޔާގެ މެސެޖުގައެވެ.
މި މެސެޖުގައި، އުފާވެރި ފިތުރު ޢީދު މުސްލިމުންނާ ބައްދަލުކުރާއިރު ފަލަސްތީނުގެ ރައްޔިތުން އެދަނީ ޔަހޫދީންގެ ހަރުކަށި ލާއިންސާނި ހަމަލާތަކާއި، އަނިޔާ ތަކުގެ ޝިކާރައަކަށްވަމުން ކަމަށާއި، އެކަން ކުށްވެރި ކުރައްވާކަމަށްވެސް ވިދާޅުވެފައިވެއެވެ. އަދި ފަލަސްތީނުގެ ރައްޔިތުންނަށް މިނިވަންކަން ހޯދައިދިނުމަށް ކުރަމުންދާ މަސައްކަތަށް ތާއީދުކޮށް، އެ މަސައްކަތް އަވަސްކުރުމަށް ވަނީ ގޮވާލައްވާފައެވެ.
މަޖިލީހުގެ ރައީސްގެ ތަހުނިޔާގެ މެސެޖުގައި، އެމަނިކުފާނުގެ އަމިއްލަ ނަންފުޅުގައާއި، ރައްޔިތުންގެ މަޖިލީހުގެ މެންބަރުންގެ ނަމުގައި، ރާއްޖޭގެ އެންމެހާ ރައްޔިތުންނަށް ފިތުރު އީދުގެ ތަހުނިޔާ ފޮނުއްވާފައިވެއެވެ.