ޝަކުވާތަކަށްފަހު އަލުން އެކުލަވާލި ވޯޓާސް ލިސްޓާއި އެކު އަންނަ ރިޔާސީ އިންތިހާބުގައި ވޯޓްލެވޭ މީހުންގެ އަދަދު މަދުވެއްޖެއެވެ.
އިލެކްޝަންސް ކޮމިޝަނުން ފުރަތަމަ އެކުލަވާލި ވޯޓާސް ލިސްޓްގައިވާ ގޮތުން އަންނަ ރިޔާސީ އިންތިހާބުގައި ވޯޓްލުމުގެ ހައްގު ލިބިގެންވާ މީހުންގެ އަދަދު 263000 އަރައެވެ. އެ ލިސްޓަށް ހުށައެޅި ޝަކުވާތައް އިސްލާހު ކުރުމަށް އަލުން އެކުލަވާލި ވޯޓާސް ލިސްޓްގައިވާ ގޮތުން ވޯޓްލުމުގެ ހައްގު ލިބިގެންވާ މީހުންގެ އަދަދީ 262141 އެވެ. މީ ކުރގެ ލިސްޓާއި އަޅާ ބަލާއިރު 859 މީހުން މަދު އަދަދެކެވެ.
އިލެކްޝަންސް ކޮމިޝަނުން ފުރަތަމަ ޢާންމުކުރި ވޯޓަރސް ލިސްޓަށް ޝަކުވާ ހުށަހެޅުމަށް ދިން މުއްދަތުގައި އެ ލިސްޓަށް 1700އަށް ވުރެ ގިނަ ޝަކުވާ ހުށައަޅާފައިވެއެވެ.
ޝަކުވާތަކަށްފަހު އަލުން އެކުލަވާ ލިސްޓަށް ޝަކުވާ ހުށައެޅުމަށް ހުޅުވާލި ފުރުސަތުގައި މިހާތަނަށް 8 ޝަކުވާ ހުށައަޅާފައިވާކަމަށް އިލެކްޝަންސް ކޮމިޝަނުން ބުނެއެވެ. އަލަށް އެކުލަވާލި ލިސްޓަށް މިހާތަނަށް ހުށައަޅާފައިވަނީ ލިސްޓްގައި ނަންނެތިގެން ހުށައެޅި މައްސަލައަކާއި މަރުވެފައިތިބި 3 މީހުން ލިސްޓްގައި ހިމެނިފައިވާ މައްސަލައެއްގެ އިތުރުން ގޭގެ އެޑްރެސް ބަދަލުވެގެން ހުށައަޅާފައިވާ 4 މައްސަލައެއް ހިމެނެއެވެ. މި ލިސްޓަށް ޝަކުވާ ހުށައެޅުމުގެ ފުރުސަތު އަންނަ އަންގާރަ ދުވަހުގެ ނިޔަލަށް ހަމަވާނެއެވެ.
ލިސްޓަށް ހުށައަޅާ ޝަކުވާތައް އިލެކްޝަންސް ކޮމިޝަނުންނާއި ރަށު ކައުންސިލްތަކުން ބަލައިގަންނަމުންދާނެކަމަށްވެސް އިލެކްޝަންސް ކޮމިޝަނުން ބުނެއެވެ.
އިޞްލާޙުތަކާއި އެކު އާ ވޯޓަރސް ލިސްޓް އިލެކްޝަންސް ކޮމިޝަނުން އާއްމުކޮށްފައިވާއިރު މި މަހުގެ ތެރޭގައި ވޯޓަރސް ރީ ރެޖިސްޓްރޭޝަނަށް ފުރުޞަތު ހުޅުވާލާނެ ކަމަށްވެސް އިލެކްޝަނުން ވަނީ ބުނެފައެވެ.