އޭޝިޔާ ޕެސިފިކް ބްރޯޑްކާސްޓިންގ ޔޫނިއަން (އޭބީޔޫ)ގެ ބައިނަލްއަޤްވާމީ ރޭޑިއޯ ސޯންގް ފެސްޓިވަލްގައި ރާއްޖެ ތަމްސީލްކުރާ ޢަބްދުﷲ ޒިޔާއު މިއަދު ކަޒިކިސްތާނަށް ފުރައިފިއެވެ.
އޭބީޔޫ ރޭޑިއޯ ސޯންގް ފެސްޓިވަލް ބޭއްވުމަށް ހަމަޖެހިފައިވަނީ މިމަހުގެ 11 ވަނަ ދުވަހުއެވެ.
މިމަހުގެ 11 ވަނަދުވަހު ކަޒަކިސްތާންގެ އާސްތާނާގައި އޮންނަ މިފެސްޓިވަލްގައި ރާއްޖެ ތަމްސީލްކުރާ ޢަބްދުﷲ ޒިޔާއު ބައިވެރިވަނީ، ޕީއެސްއެމްއިން ހުޅުވާލި ފުރުޞަތުގައި ވާދަކޮށްގެންނެވެ. މޯލްޑިވިއަން އައިޑޮލް ސީޒަން 1ގައި ވާދަކުރި އައްޑުސިޓީއަށް އުފަން ޒިޔާއު ވަނީ އެ ޝޯގެ ޕިއާނޯ ރައުންޑާހަމަޔަށް ދަތުރުކޮށްފައެވެ. މިފަހަރުގެ ފެސްޓިވަލްގައި ހުށަހަޅައިދޭން ހަމަޖެހިފައިވަނީ "ކުރިއަށްދާނީ ގަދަ ހިތްވަރުން "ގެ ނަމުގައި ތައްޔާރުކޮށްފައިވާ ލަވައެކެވެ. މިއީ އަމިއްލަ ރާގަކަށް ތައްޔާރުކޮށްފައިވާ ލޯފަންކުދިންނަށް ޚާއްސަކޮށްފައިވާ ލަވައެކެވެ.
2016ވަނަ އަހަރު ޖަޖިން ރައުންޑްއިން ފެއިލްވުމުގެ ސަބަބުން އޭބީޔޫގައި ލަވަ ހުށަހަޅަން ނުލިބުނު ޒިޔާއު ހުރީ މިފަހަރުގެ ފެސްޓިވަލްގައި ލަވަ ހުށައަޅާދޭން ފުރުޞަތު ލިބުމުން ވަރަށް އުފަލުންނެވެ. އަދި މިއީ ޚާއްސައެހީއަށް ބޭނުންވާ ކުދިންނަށްނަށްވެސް މިފަދަ ބޮޑުފެސްޓިވަލެއްގައި ވާދަކުރެވޭނެކަން ހާމަކޮށްދިނުމަށް ލިބިގެންދިޔަ ރަނުގެ ފުރުޞަތެއްކަން ފާހަގަކުރިއެވެ.
އައްޑޫ ސިޓީ ހިތަދޫއަށް އުފަން ޢަބްދުﷲ ޒިޔާއު އަކީ ޕަބްލިކް ސަރވިސް މީޑީއާގެ ދިވެހި ރާއްޖޭގެ އަޑުގެ ދިވެހި އެފްއެމްގައި މަސައްކަތްކުރާ ޕްރެޒެންޓަރެކެވެ. ރާއްޖޭގައި ފުރަތަމަފަހަރަށްބޭއްވި މޯލްޑިވިއަން އައިޑަލް ސީޒަން އެކެއްގައި ވާދަކުރި ޒިޔާއަކީ ލަވަކިޔުމުގެ ދާއިރައިރާގައިވެސް ފާހަގަކޮށްލެވޭ ޒުވާނެކެވެ.
މިފަހަރުގެ އޭބީޔޫ ފެސްޓިވަލްގައި ރާއްޖެއާއެކު 9 ޤައުމަކުން ވާދަކުރެއެވެ. އޭގެތެރޭގައި ފެސްޓިވަލް ބާއްވާ ކަޒަކިސްތާނާއި އިންޑިއާއާއި އަފްޣާނިސްތާނާއި މަކާއޯއާއި ނޭޕާލާއި ތުރުކީއާއި ތުރުކެމިނިސްތާނާއި ވިއެޓްނާމް ހިމެނެއެވެ.
އޭބީޔޫއަކީ ދުނިޔޭގެ ފަސްދޮޅޮސް ނުވަ ޤައުމަކުން ބައިވެރިވެފައިވާ ބައިނަލްއަޤްވާމީ ޖަމްޢިއްޔާއެކެވެ.
އޭބީޔޫ ސޯންގް ފެސްޓިވަލްގައި ޕީއެސްއެމުން ރާއްޖެ ތަމްސީލްކުރާ މިއީ ތިންވަނަ އަހަރެވެ. އެބީޔޫ ރޭޑިއޯ ސޯންގް ފެސްޓިވަލްގެ އިތުރުން ޓީވީ ސޯންގް ފެސްޓިވަލާއި އޭބީޔޫ ޑާންސް ފެސްޓިވަލްގައިވެސް ރާއްޖެ އަންނަނީ ވާދަކުރަމުންނެވެ. މި ފެސްޓިވަލްތަކުގައި ރާއްޖޭގައި ތިބި މަޝްހޫރު ލަވަކިޔުންތެރިންނާއި މި ދާއިރާއަށް އަލަށް ނުކުންނަ މީހުން ވާދަކޮށްފައިވާކަން ފާހަގަކުރެވެއެވެ.