އިސްލާމީ ހޭލުންތެރިކަމާ ބެހޭ ބައިނަލްއަޤުވާމީ 3 ވަނަ މަހާސިންތާގައި 31 ދިރާސާ ކަރުދާހެއް ހުށަހަޅައި ފުރަތަމަދުވަހުގެ ސެޝަންތައް ނިންމާލައިފިއެވެ.
މިގޮތުން ހެނދުނު ދަންފަޅީގައި 14 ކަރުދާހެއް ހުށައަޅާފައިވާއިރު މެންދުރު ފަހުގެ ދަންފަޅީގައި 17 ކަރުދާހެއް ވަނީ ހުށަހަޅާފައެވެ.
ކަރުދާސްތައް ހުށައެޅި ދާއިރާތަކުގެ ތެރޭގައި އިޤްތީޞާދާއި ވަޤްފު، ޢާއިލީ ތަރުބިއްޔަތު އިދާރީ ހިންގުންފަދަ ދާއިރާތަކަށް ދިރާސާ ކަރުދާސްތައް ހުށަހަޅާފައިވެއެވެ. މީގެ އިތުރުން ތަޢުލީމީ ދާއިރާގެ މަޢުލޫމާތުގެ ތެރޭގައި އެދާއިރާގެ ފަންޑިން ސްކީމާބެހޭ ކަރުދާސްތަކާއި ސަރަޙައްދީ ފެންވަރުގައި އިޤްތިޞާދީ އިޖްތިމާޢީ ސިއްޙީ މައްސަލަތަކަށް ކޮށްފައިވާ ދިރާސާ ކަރުދާސްތައްވެސް ވަނީ ހުށައަޅާފައެވެ.
ފުރަތަމަ ދުވަހުގެ ސެޝަންތަކުގައި ކީ ނޯޓް ދެއްވާފައިވަނީ ސިވިލްސަރވިސް ކޮމިޝަންގެ ރައީސް ޑރ.ޢަލީ ޝަމީމާއި ޕާކިސްތާނުގެ އިސްލާމް އާބާދުގައި ހުންނަ ރިފަރ އިންޓަރނޭޝަނަލް ޔުނިވަރސިޓީގެ ވައިސް ޗާންސެލަރ އަދި ފައުންޑަރ ފްރޮފެސަރ ޑރ.އަނީސް އަޙްމަދެވެ.
އިސްލާމިކް ޔުނިވަރސިޓީން ބުނީ ފުރަތަމަ ދުވަހުގެ ސެޝަންތަކުގައި ޕާކިސްތާން، އިންޑޮނޭޝިއާ އާއި ސަރަޙައްދީ އެހެން ޤައުމުތަކުންވެސް ކަރުދާސްތައް ހުށައަޅާފައިވާކަމަށެވެ. މީގެ އިތުރުން މި ސެޝަންތަކުގައި އިސްލާމިކް ޔުނިވަރސިޓީގެ މާސްޓާރސް އޮފް އާރޓްސްއިން ޓީސޯލް ކިޔަވާ 4 ދަރިވަރަކު ތަޢުލީމީ ދާއިރާއިން ކަރުދާސް ހުށައެޅިކަމަށެވެ.
ދެދުވަހުގެ މުއްދަތަށް "ރޯލް އޮފް އިސްލާމިކް ތޯޓް، ކަލްޗަރ، އެންޑް ސިވިލައިޒޭޝްން އިން ބިލްޑިންގް ޕީސް، ހާމަނީ އެންޑް ޓޮލަރެންސް އިން ސައުތު އޭޝިއާ" މިޝިއާރުގެ ދަށުން ކުރިއަށްދާ މިމަހާސިންތާގައި 43 ދިރާސާ ކަރުދާސް ހުށަހަޅާނެކަމަށް އިސްލާމިކް އުނިވަރސިޓީން ބުނެއެވެ. މީގެތެރޭގައި މި ކޮންފަރެންސްގައި ބައިވެރިވާ ބޭރުގެ އެކި ޤައުމުތަކުގެ ބޭފުޅުން ހުށަހަޅުއްވާ 37 ކަރުދާހަކާއި ރާއްޖޭގެ 6 ބޭފުޅަކު ހުށަހަޅުއްވާ ކަރުދާސް ހިމެނެއެވެ. މި މަހާސިންތާގައި 12 ޤައުމެއްގެ ޢިލްމީ ބޭފުޅުން ބައިވެރިވަޑައިގަންނަވައެވެ.