ހއ ދިއްދޫގައި ސަރުކާރުން ތަރައްޤީކުރަމުންދާ ހައުސިން ޔުނިޓްތަކުގެ ތެރެއިން 100 ހައުސިން ޔުނިޓަށް ކުރިމަތިލުމުގެ ފުރުޞަތު ހުޅުވާލައިފިއެވެ. މިއީ ދިއްދޫ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ ދަތިކަން ޙައްލުކުރުމަށްޓަކައި ސަރުކާރުން ކުރިއަށްގެންދާ މަޝްރޫއެކެެވެ.
މި ހައުސިން ޔުނިޓްތަކަށް ކުރިމަތިލުމަށް ބޭނުންވާ ފަރާތްތަކުން މިއަދުން ފެށިގެން ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް ހައުސިންގ މިނިސްޓްރީއަށް ފޯމް ހުށަހެޅުމުގެ ފުރުސަތު އެމިނިސްޓްރީން ވަނީ ހުޅުވާލާފައެވެ. މިކަމަކީ ދިއްދޫގެ ރައްޔިތުން، ޚާއްޞަކޮށް ޒުވާނުން ވަރަށް ބޮޑަށް އެދެމުންދާކަމެއްކަން ހައުސިން މިނިސްޓްރީން ފާހަގަކުރެއެވެ.
ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން ދިއްދޫގައި 250 ހައުސިން ޔުނިޓް ޤާއިމްކޮށްފައިވެއެވެ. އޭގެ ތެރެއިން 140 ހައުސިން ޔުނިޓް ވަނީ މީގެ ކުރިން ދޫކޮށްފައެވެ. އެހައުސިން ޔުނިޓްތައް ދޫކޮށްފައިވަނީ އެޑްވާންސް ޕޭމަންޓެއްގެ ގޮތުގައި 19000 ރުފިޔާ އަދި 20 އަހަރު ދުވަހުން ފައިސާ ދައްކާ ޚަލާސްކުރާ އުސޫލުން މަހަކު 2500 ރުފިޔާ ދައްކާ ގޮތަށެވެ. މި ފަހަރު ހުޅުވާލި 100 ހައުސިން ޔުނިޓަށްވެސް ފައިސާ ދެއްކުމަށް ހަމަޖެހިފައިވަނީ މިއުޞޫލުގެ ދަށުންނެވެ.