ކުރިއަށްއޮތް ދުވަސްވަރަކީ ޗުއްޓީ ދުވަސްވަރެއްކަމުން އަރިދަފުސް ރޯގާއާއި މިނޫންވެސް ގައިގައިން އަރާ ބަލިތައް އިތުރުވެގެން ދިޔުމުގެ ފުރުޞަތު އޮންނާނެތީ އެކަމުން ސަމާލުވެ ތިބުމަށް ހެލްތް ޕްރޮޓެކްޝަން އެޖެންސީ އެޗްޕީއޭއިން އިލްތިމާސްކޮށްފިއެވެ.
މިކަމަށް އިލްތިމާސްކޮށް އެޗްޕީއޭއިން ޢާއްމު ކުރި ބަޔާނުގައި ވަނީ، ކުރިއަށް އޮތް ދުވަސްވަރަކީ އަޟްޙާ ޢީދު ޗުއްޓީއަށްވެފައި، މި ދުވަސްވަރު ދަތުރު ފަތުރު ކުރުން އިތުރުވުމާއެކު ގޭގެއަށް ޒިޔާރާތް ކުރުމާއި، ތަންތަނަށް މީހުން އެއްވެ އުޅުން އިތުރު ވެގެންދާނެތީ، ޖެހިދާނެ ބަޔަށް ހުރިހައި ރައްޔިތުންވެސް ސަމާލުވާންޖެހޭކަމަށެވެ. އަދި ޗުއްޓީ ދުވަސްވަރަކަށް ވުމާއެކު ކެއިންބުއިމުގެ އާދަތަކަށް ބެލުމާއި، މިހާރު ރާއްޖެއަށް ކުރަމުންދާ ވިއްސާރައާއި ގުޅިގެން ޑެންގީ ހުމާއި ބައެއް ރޯގާތަކާއި ބަލިމަޑުކަން ފެތުރުމުގެ ފުރުޞަތު ބޮޑުކަމުގައި ވާތީ މިކަމަށް ސަމާލުވުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.
މީގެ އިތުރުން ޙައްޖުގެ އަޅުކަމަށްފަހު ޙައްޖުވެރިން އެނބުރި އަންނަ ދުވަސްވަރަކީ ކޮންމެ އަހަރަކުވެސް އަރިދަފުސް ރޯގާއާއި ހުން ފެތުރުން އިތުރުވެގެންދިޔުމުގެ ބޮޑު ދުވަސްވަރަކަށް ވާތީ ރައްކާތެރިވުމުގެ ފިޔަވަޅު އެޅުމަށްވެސް އެޗްޕީއޭއިން އިލްތިމާސްކުރެއެވެ. އެގޮތުން އެއްވެސް ގޮތަކަށް ރޯގާ ޖެހިއްޖެނަމަ ނުވަތަ ކެއްސާ ކިނބިހި އަޅާނަމަ، މީހުން އެއްވެ އުޅޭ ތަންތަނަށް ދިޔުން މަދުކުރުމާއި، ޚާއްސަކޮށް މިފަދަ ތަންތަނަށް ކުޑަކުދިން ގުނެންދިޔުމަށާއި، ރޯގާ ޖެހިފައިވާނަމަ ކުޑަކުދިން ކައިރިއަށް ނުދިޔުމާއި އެކުދިން އުރައި ނުހެދުމަށް ވެސް އެޗްޕީއޭއިން ވަނީ އިލްތިމާސްކޮށްފައެވެ.
ކާބޯތަކެތި ބޭނުންކުރުމުގެ ކުރިން ރަނގަޅަށް ރޯފިލާ ވަރަށް ކެއްކުމާއި، ކެއްކުމަށްފަހު ބާކީ ވާ ކާނާ ފަހުން ބޭނުން ކުރާނަމަ ރަނގަޅަށް ހޫނުކޮށްގެން ހޫނުކަންމަތީ ބޭނުންކުރުމާއި، ބޭރުން ކައިބޮއި ހެދުމުގައިވެސް ޢާއްމު ސާފުޠާހިރުކަމަށް ޚާއްޞަ ސަމާލުކަމެއް ދިނުމާއި، ކާބޯތަކެތި ވީހާވެސް ތާޒާ ކަންމަތީ ބޭނުންކުރުމަށްވެސް އެޗްޕީއޭއިން އިލްތިމާސްކުރެއެވެ.
ހެލްތް ޕްރޮޓެކްޝަން އެޖެންސީން ވަނީ ހުސްފުޅި ދަޅުފަދަ ފެން ހަރުލާ ތަކެތި ގޯތިތެރެއާއި މަގުމައްޗަށް އުކާނުލުމާއި މިފަދަ ތަކެތި ފެން ހަރުލުމުން ޑެންގީ ފަތުރާ މަދިރި އާލާވުމަށް މަގުފަހިވެގެންދާނެތީ އެކަމަށް ރައްކާތެރިވުމަށްވެސް އިލްތިމާސްކޮށްފައެވެ. އަދި މަދިރި ހެފުމުން ސަލާމަތް ވުމަށްޓަކައި ވީހާވެސް ބޮޑަށް ހަށިގަނޑު ނިވާވާ ގަޔަށް ދޫ، އަތްދިގު ހެދުންލުމަށާއި، މަދިރި ލޯޝަން ބޭނުންކުރުމަށާއި، ހޭންޑް ފުޓް އެންޑް މައުތު ބަލި އަދި ފާނަބަސަންދު ފަދަ ގައިންގަޔަށް އަރާ ބައްޔެއް ޖެހިއްޖެނަމަ، މީހުން އެއްވެއުޅޭ ތަންތަނަށް ނުދިއުމަށްވެސް އެޗްޕީއޭއިން އިލްތިމާސްކުރެއެވެ.
މީގެ އިތުރުން ޙައްޖުން އެނބުރި އަންނަތާ 14 ދުވަސްތެރޭގައި ހުންއައިސް، ކެއްސާ، ނޭވަލާން އުނދަގޫވެ އަދި މިނޫންވެސް އިތުރު ބައްޔެއްގެ ޢަލާމާތެއް ފެންނަނަމަ ލަސްނުކޮށް ޑޮކްޓަރަށް ދެއްކުމަށްވެސް އެޗްޕީއޭއިން އިލްތިމާސްކުރެއެވެ.