އައްޑޫ ސިޓީ ކައުންސިލްގެ ބައި އިލެކްޝަން އެމްޑީޕީ އަށް ކާމިޔާބު ކުރެވުމަކީ ސަރުކާރަށް ލިބުނު ބޮޑު ނާކާމިޔާބީއެއް ކަމަށް އެމްޑީޕީގެ ޗެއަރ ޕާސަން އަލީ ވަހީދު ވިދާޅުވެއްޖެއެވެ.
އެމްޑީޕީގެ އޮފީހުގައި މިއަދު ނޫސްވެރިންނަށް މަޢުލޫމާތު ދެއްވަމުން އަލީ ވަހީދު ވިދާޅުވީ މި ބައި އިލެކްޝަންގެ ތެރޭގައި ސަރުކާރުން އެންމެ މަތީ ދަރަޖައަށް ނުފޫޒު ފޯރުވާފައި ވާކަމަށެވެ. އެގޮތުން ސީދާ ރައީސުލް ޖުމްހޫރިއްޔާއިން ފެށިގެން މި އިންތިޚާބަށް ނުފޫޒު ފޯރުވުމަށް ސަރުކާރުގެ ވަސީލަތް ބޭނުން ކުރައްވައިގެން މަސައްކަތް ކުރައްވާފައި ވާކަމަށް އަލީ ވަހީދު ތުހުމަތު ކުރެއްވިއެވެ. ނަމަވެސް އެފަދަ ކަންކަމަށް ދިވެހި ރައްޔިތުން ނުހެއްލޭނެ ކަމުގެ ނަމޫނާ އައްޑު ރައްޔިތުން ދައްކުވައި ދީފި ކަމަށް އަލީވަހީދު ވިދާޅުވި. އަލީ ވަހީދު ވިދާޅުވީ މިއީ އެމްޑީޕީގެ އާ ލީޑަރޝިޕާއިއެކު އެޕާޓީން ހޯދި ބޮޑު ކާމިޔާބީއެއް ކަމަށެެވެ.
އައްޑޫ ސިޓީ ކައުންސިލްގެ އިންތިހާބާއި އެކު އިއްޔެ ދެން ކުރިއަށް ގެންދިޔަ ނ.ވެލިދޫ ކައުންސިލްގެ ބައި އިލެކްޝަނުން، ސަރުކާރު ކޯލިޝަންގައި ހިމެނޭ އެމްޑީއޭގެ ކެނޑިޑޭޓް ކުރި ހޯދުމާއި ގުޅޭގޮތުން ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން އަލީ ވަހީދު ވިދާޅުވީ، އެމްޑީއޭއަކީ ވެސް ސަރުކާރުގެ ތެރޭ ބާރު އޮތް ޕާޓީއެއް ކަމަށް މިހާރު ބެލެވެން ނެތްކަމަށެވެ. އަދި ސަރުކާރު މިހާރު ކޮންޓްރޯލް ކުރައްވަމުން ގެންދަވަނީ ދެތިން ބޭފުޅަކު ބޭނުންފުޅު ވާގޮތަށް ކަމަށް އަލީ ވަހީދު ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި އެމްޑީޕީން ވަނީ އެޕާޓީން ކުރިއަށް ރާވާފައި ވާ ކަންކަން ހާމަކޮށްފައެވެ. އެގޮތުން މާދަމާރޭ ކާނިވަލް ސަރަހައްދުގައި ބޮޑުޖަލްސާއެއް ބޭއްވުމަށް ތައްޔާރު ވަމުން އަންނަކަމަށާއި ބުދަ ދުވަހުގެ ރޭ ޤައުމީ މަޖިލީހުގެ ބައްދަލުވުމެއް ބާއްވާނެ ކަމަށް އެޕާޓީން ބުނެއެވެ. އަތޮޅުތެރޭގެ ހަރަކާތްތައް ފެށުމަށްޓަކައި މި މަހުގެ ފަންސަވީސް ވަނަ ދުވަހު އަޑޫސިޓީގައި، ޕާޓީގެ ލީޑަރޝިޕު ބައިވެރިވާ ޖަލްސާއެއް ބާއްވަން ރާވާފައި ވާކަމަށްވެސް އެޕާޓީން ބުނެއެވެ.