މިހާރު ރާއްޖެއަށް ކުރަމުންދާ ވިއްސާރާގައި ރާއްޖޭގެ ބައެއް އަތޮޅުތަކަށް މޫސުން ގޯސްވާނެކަމަށް ލަފާކޮށް ޔެލޯ އެލަރޓް ނެރެފިއެވެ.
ޔެލޯ އެލާރޓް ނެރެފައިވަނީ ބ.އަތޮޅުން ފެށިގެން މ. އަތޮޅުގެ ރަށްތަކުގެ ދެމެދުގެ އަތޮޅުތަކަށެވެ. މޫސުމާބެހޭ ގައުމީ އިދާރާއިން ބުނީ މިއަތޮޅުތަކަށް ޔެލޯ އެލާރޓް ނެރެފައިވަނީ މިއަދު ހެނދުނު 10:00 އިން ފެށިގެން 14:00 ގެ ނިޔަލަށް ކަމަށެވެ.
ރާއްޖޭގެ މޫސުން ކުރިއަށްލަފާކުރާގޮތަށް ބަލާއިރު، ރާއްޖޭގެ ބޮޑުބަޔަކަށް ވާރޭވެހި ވައިގަދަވާނެކަމަށް ލަފާކުރެވޭ ކަމަށް މޫސުމާބެހޭ ޤައުމީ އިދާރާއިން ބުނެއެވެ. އަދި ވިލާގަނޑުގައި 50 މޭލައް ވައިގަދަވާނެ ކަމަށް ލަފާކުރެވޭކަމަށާ، އެހެންކަމުން ދަތުރުކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް މޫސުމާބެހޭ ޤައުމީ އިދާރާއިން ބުނެއެވެ.އަދި ދިޔަވަރު ބޮޑުވާ ވަގުތު ތަކުގައި ދެކުނާއި މެދުތެރޭގެ ބައެއް ރަށްތަކަށް އުދައެރުން އެކަށީގެންވާކަމަށްވެސް މޫސުމާ ބެހޭ އިދާރާއިން ލަފާކުރެއެވެ.
ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި ވޭތުވެދިޔަ 24 ގަޑިއިރު ކަނޑުމަތީގެ ދެ ހާދިސާ އެމްއެންޑީއެޕްއަށް ރިޕޯޓްކޮށްފައިވެއެވެ. އަދި ވިއްސާރާގައި މިހާތަނަށް އެއްވެސް ރަށަކަށް ގެއްލުމެއް ލިބިފައިނުވާއިރު ޑިޒާޒްޓަރ މެނޭޖް މަންޓް ސެންޓާރުން ގެންދަނީ ރަށްތައް މޮނޮޓަރ ކުރަމުންނެވެ. ވިއްސާރައިގައި ދިމާވެދާނެ ގެއްލުމަށް ރައްކާތެރިވެތިބުމަށް ސަލާމަތީ ފިޔަވަޅު އަޅައިގެންތިބުމަށް ކަމާބެހޭ އިދާރާތަކުން އިލްތިމާސްކުރެއެވެ.