ޗައިނާގެ ބެލްޓް އެންޑް ރޯޑްގައި ހިމެނޭ ޤައުމުތަކާއި ޗައިނާއާ ދެމެދު އޮންނަ ސަގާފީ ގުޅުން ބަދަހި ކުރުމުގެ މަޤްސަދުގައި ބާއްވާ 'ކަލަރފުލް ވޯލްޑް' އިންޓަރނޭޝަނަލް ކަލްޗުރަލް އެގްޒިބިޝަންގައި ރާއްޖެއިން ބައިވެރިވެއްޖެއެވެ.
ޗައިނާގެ ވެރިރަށް ބެއިޖިންގައި 4 ދުވަހުގެ މުއްދަތަކަށް ކުރިއަށްދިޔަ މި އެގްޒިބިޝަން އަމާޒުކޮށްފައިވަނީ ޗައިނާގައި ހުންނަ ބޭރު ޤައުމުތަކުގެ އެމްބަސީތަކަށެވެ. އެގޮތުން ގާތްގަނޑަކަށް 45 އެމްބަސީއަކުން މި އެގްޒިބިޝަންގައި ބައިވެރިވިއެވެ.
ޗައިނާގައި ހުންނަ ރާއްޖޭގެ އެމްބަސީން ވަނީ ދިވެހިންގެ ސަގާފަތާއި އާދަކާދަތައް ދައްކުވައިދޭފަދަ ސްޓޯލްއެއް ތައްޔާރުކޮށްފައެވެ. އަދި މީގެ އިތުރުން ރާއްޖޭގެ ސްޓޯލްއަށް ޒިޔާރަތްކުރާ ފަރާތްތަކަށް ރާއްޖޭގެ ފަތުރުވެރިކަމާ ގުޅޭ މައުލޫމާތުތައްވެސް ވަނީ ދީފައެެވެ.
ޗައިނާގައި ހުންނަ ރާއްޖޭގެ އެމްބަސީން މައުލޫމާތުދޭ ގޮތުގައި ކަލަރފުލް ވޯލްޑް އެގްޒިބިޝަންގެ ތެރެއިން ގިނަ އަދަދެއްގެ ބަޔަކު ވަނީ ރާއްޖޭގެ ސްޓޯލްއަށް ޒިޔާރަތްކޮށް ރާއްޖެއާ ގުޅޭ އެކި ކަހަލަ މައުލޫމާތު އޮޅުންފިލުވާފައެވެެ. އަދި މީގެ އިތުރުން ރާއްޖޭގެ ސްޓޯލްގައި ބަހައްޓާފައިވާ ދިވެހި ސަގާފީ ތަކެއްޗަށްވެސް ޗައިނާ ރައްޔިތުންގެ ފަރާތުން ބޮޑު ޝަޢުގުވެރިކަމެއް ލިބިގެންދިޔަ ކަމަށް އެމްބަސީން ފާހަގަކުރެއެވެ.
ކަލަރފުލް ވޯލްޑް އެގްޒިބިޝަން ބާއްވަން ފެށިފަހުން 3 އަހަރު ފުރިފައިވާ އިރު، ރާއްޖެއިން ކޮންމެ އަހަރަކުވެސް މި އެގްޒިބިޝަންގައި އަންނަނީ ބައިވެރިވަމުންނެވެ.