ރައީސުލްޖުމްހޫރިއްޔާގެ ނާއިބު ފައިޞަލް ނަސީމް މާފުށީ ޖަލުގެ ޙާލަތު ބައްލަވައިލައްވައިފިއެވެ.
މާފުށީ ޖަލުގެ ޙާލަތު ބައްލަވާލެއްވުމަށް ކުރެއްވި ޒިޔާރާތުގައި އެމަނިކުފާނު ވަނީ ޖަލުގައި ހިމެނޭ އެކި ޔުނިޓްތަކަށް ޒިޔާރަތްކުރައްވައި އެތަން ތަނުގެ ޙާލަތު ބައްލަވާލައްވާފައެވެ.އަދި ޤައިދީން ކޮށްފައިވާ ބައެއް މަސައްކަތްތައް ބައްލަވާލައްވާ ބައެއް ޤައިދީންނާވެސް އެމަނިކުފާނު ވަނީ ބައްދަލުކުރައްވާފައެވެ.
މި ޒިޔާރާތުގައި ނާއިބްރައީސް ފައިޞަލް ނަޞީމް ވަނީ މާފުށީ ޖަލު ބަލަހައްޓަމުންދާ މުވައްޒަފުންނާވެސް ބައްދަލުކުރައްވާފައެވެ. މި ބައްދަލުކުރެއްވުމުގައި ވާހަކަފުޅުދައްކަވަމުން ނާއިބް ރައީސް ވިދާޅުވީ ސަރުކާރުން މާފުށީ ޖަލުގެޙާލަތު ރަނގަޅުކުރުމަށް މަސައްކަތް ކުރައްވާނެކަމަށެވެ. އެގޮތުން ޖަލުގައި ތިބި ޤައިދީންނަށް އިތުރު ހުނަރު ދަސްކޮށްދީ، ޤައިދީންނަކީ މުޖުތަމަޢަށް ފައިދާކުރާނެ ބަޔަކަށް ހެދުމަށް މަސައްކަތް ކުރައްވާނެކަމަށް ނާއިބްރައީސް ވިދާޅުވިއެވެ.
" ޖަލަށް ގެނެސްފައިތިބި މީހުންނަކީ އަދަބެއް ދިނުމަށް ގެނެސް ތިބިބައެއްކަމަށް ނުވިސްނާ އެ މީހުންނަކީ ވެސް މުޖުތަމައުގައި ބޭނުންތެރި ބައެކަށް ހެދުމަށް މަސައްކަތްކޮށްދިނުން އެދެން. ޖަލަށް މިހާރު ދިމާވަމުންދާ ދަތިތައް ހައްލުކުރުމަށް މަސައްކަތް ކުރާނަށް. އެމީހުންނަކީވެސް އަހަރުމެންފަދަ ބަޔަކަށް ވުމާއެކު އަޅާލުމަކީ މުހިންމުކަމެއް."ނައިބްރައީސް ވިދާޅުވިއެވެ.
ނާއިބްރައީސް މާފުށީ ޖަލަށް ކުރެއްވި ޒިޔާރަތުގައި އެ މަނިކުފާނުވަނީ މެހުމާނުން ސޮއިކުރާ ފޮތުގައި ސޮއިކުރައްވާފައެވެ. މި ޒިޔާރަތުގައި ނާއިބްރައީސްގެ އަރިހުގައި ހޯމް މިނިސްޓަރ އައްޝައިޚް އިމްރާން އަބްދުﷲ ވެސް ބައިވެރިވެވަޑައިގެންފައިވެއެވެ.