ފ. ނިލަންދޫގައި އިސްލާމިކް ސެންޓަރެއް ހެދުމާ ގުޅޭގޮތުން މަޝްވަރާކޮށްފިއެވެ.
އިސްލާމިކް މިނިސްޓްރީން ބުނީ ފ. ނިލަންދޫގައި އިސްލާމިކް ސެންޓަރެއް އަޅައި، ޤުރުއާން އުގަންނައިދިނުމުގެ މަސައްކަތް އެރަށުގައި އިތުރަށް ފުޅާކުރުމާ ގުޅޭގޮތުން އިސްލާމިކް މިނިސްޓަރ އެރަށު ކައުންސިލާ މަޝްވަރާކޮށްފައިވާކަމަށެވެ. އެގޮތުން ނިލަންދޫގައި ހުންނަ ކީރިތި ޤުރުއާނާބެހޭ މަރުކަޒުގެ ގޮފީގެ ހިންގުން ހަރުދަނާކޮށް ކުރިއެރުވުމާ ގުޅޭގޮތުން މިބައްދަލުވުމުގައި މަޝްވަރާކޮށްފައިވާކަމަށް އިސްލާމިކް މިނިސްޓްރީން މައުލޫމާތުދެއެވެ.
މީގެ އިތުރުން ނިލަންދޫގައި ހުރި މިސްކިތްތަކުގެ އާބާތުރަފިލުވުމާއި، މިސްކިތްތައް އަލުން ރަނގަޅު ފެންވަރަށް މަރާމާތު ކުރުމާގުޅޭގޮތުންވެސް މިބައްދަލުވުމުގައި ވަނީ މަޝްވަރާކޮށްފައެވެ. ނިލަންދޫގައި އިސްލާމިކް ސެންޓަރެއް ތަރައްޤީކުރުމުގެ މަޝްރޫޢު ބަޖެޓްގައި ހިމަނާފައިވަނީ މިސަރުކާރުންނެވެ.
މާލެ ފިޔަވައި ރާއްޖޭގައި އިސްލާމިކް ސެންޓަރެއް ޤާއިމު ކޮށްފައިވަނީ ގދ. ތިނަދޫގައެވެ. އެ ސެންޓަރު ހުޅުވާފައިވަނީ މިއަހަރުގައެވެ.