އާއިލާ އާއި ކުޑަކުދިންނަށް ޖަޒީރާ މާހައުލެއް ހޯދައިދިނުމަށް ހުކުރު ދުވަސްތަކުގައި މާލޭގައި ބަންދުކުރުމަށް ހަމަޖެހިފައިވާ މަގުތައް ކުރިއަށް އޮތް ދެދުވަހުގެތެރޭގައި އިޢުލާންކުރައްވާނެކަމަށް މިނިސްޓަރ އޮފް ހައުސިން އެންޑް އަރބަން ޑިވަލޮޕްމަންޓް އައިމިނަތު އާޠިފާ ވިދާޅުވެއްޖެއެވެ.
ހައުސިން މިނިސްޓަރ އާޠިފާ ވިދާޅުވީ މި މަސައްކަތް ކުރުމަށްޓަކައި، ފުލުހުންނާއި މާލެސިޓީ ކައުންސިލާއެކު ޓެކްނިކަލް ލެވެލްގެ ބައްދަލުވުންތަކެއް ބޭއްވުމަށްފަހު، ބަންދު ކުރުމަށް ހަމަޖެހިފައިވާ މަގުތައް މިހާރު ފާހަގަކޮށްފައިވާކަމަށެވެ. އަދި މިހާރު ކުރިއަށްދަނީ މިކަން ކުރުމަށްޓަކައި އިދާރީގޮތުން ކުރަންޖެހޭ މަސައްކަތްތަކާއި ކަނޑައަޅަންޖެހޭ އުސޫލުތަކާމެދު މަޝްވަރާކޮށް ނިންމަންޖެހޭ ނިންމުންތައް ނިންމުމުގެ މަސައްކަތް ކަމަށްވެސް މިނިސްޓަރ ވިދާޅުވިއެވެ. އަދި ކުރިއަށް އޮތް ދެތިން ދުވަހުގެ ތެރޭގައި ނުވަތަ އަންނަ ހަފްތާގައި އެ މަގުތަކާއި ސަރަޙައްދުތައް ކަނޑައަޅާ އެކަން އާންމުކޮށް އިއުލާން ކުރައްވާނެ ކަމަށް މިނިސްޓަރ ވިދާޅުވިއެވެ.
މާލޭގައި ކަނޑައެޅޭ މަގުތަކެއް ހުކުރު ދުވަހު ހެނދުނު ބަންދުކޮށް އާއިލާ އާއި ކުޑަކުދިންނަށް ޖަޒީރާ މާހައުލެއް ހޯދައިދިނުމަކީ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހްގެ ސަރުކާރުގެ ފުރަތަމަ 100 ދުވަހުގެ ތެރޭގައި ކުރުމަށް ހަމަޖެހިފައިވާ ކަމެކެވެއެވެ. އަދި މިވަޢުދަކީ މި ސަރުކާރުގެ ފުރަތަމަ 30 ދުވަހު ކުރުމަށް ކަނޑައަޅާފައިވާ ކަމެކެވެ. މިއީ ތޮއްޖެހިފައިވާ މާލެ އިޖްތިމާޢީގޮތުން ރައްކާތެރި ތަނަކަށް ހެދުމަށް ސަރުކާރުން ކުރަމުންދާ މަސައްކަތައް ލިބިގެންދާނެ އިތުރު ކުރިއެރުމެއްކަމަށް ސަރުކާރުން ދެކެއެވެ.