އިންޑިއާ ކަނޑުން އެކި ޤައުމުތަކަށް މަސްބޭނޭނެ އެންމެ މަތީ އަދަދު ކަނޑައެޅުމާއި ބެހޭ މުޙިއްމު މަޝްވަރާ ބައްދަލުވުމެއް ރާއްޖޭގައި ފަށައިފިއެވެ.
ދެ ދުވަހުގެ މުއްދަތަށް ހޮޓެލް ޖެންގައި ކުރިއަށްދާ މި ބައްދަލުވުމުގައި އިންޑިއާ ކަނޑުގެ އައްސޭރިފަށުގެ 16 ޤައުމަކުން ބައިވެރިވެއެވެ.
އިންޑިއާ ކަނޑުގެ މަސްވެރިކަން ދެމެހެއްޓެނިވި ގޮތެއްގައި ކުރެވިދާނެ ގޮތްތަކާއި ބެހޭގޮތުން އިންޑިއާ ކަނޑުގެ އައްސޭރިފަށުގެ ޤައުމުތަކުގެ މެދުގައި މަޝްވަރާކުރުމަށް ބާއްވާ މިބައްދަލުވުން ފައްޓަވައިދެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދުއެވެ.
ދިވެހިރާއްޖެއިން އިސްނަގައިގެން، އިންޑިއާ ކަނޑުން އެކި ޤައުމުތަކަށް މަސްބޭނޭނޭ އެންމެ މަތީ އަދަދު ކަނޑައެޅުމާއި ބެހޭ ހުށަހެޅުމެއް ވަނީ މިދިޔައަހަރު މޭމަހު ބޭއްވުނު އިންޑިއަން އޯޝަން ޓޫނާ ކޮމިޝަންގެ 21 ވަނަ ބައްދަލުވުމުގައި ހުށަހަޅާފައެވެ. މިއަދު ފެށި ބައްދަލުވުމަކީ މި ގަރާރާއި މެދު އިންޑިއާ ކަނޑުގެ އައްސޭރިފަށުގެ ޤައުމުތަކުގެ މެދުގައި ހިޔާލު އެއްގޮތްކުރުމެވެ.
މި ބައްދަލުވުމާއި ގުޅޭގޮތުން ޕީއެސްއެމް ނިއުސްއަށް ދެއްވި އިންޓަރވިއުއެއްގައި މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވީ، މި ގަރާރު ފާސްވެގެން ދިޔުމުން ރާއްޖެފަދަ ކުދި ޖަޒީރާ ރަށްތަކަށް ގިނަ ފައިދާތަކެއް ލިބިގެންދާނެ ކަމަށެވެ.
"ރާއްޖެއަށްވެސް މަންފާ ބޮޑު ގޮތަކަށް ވަކާލާތު ކުރުމުން މިދަނީ އެހެންކަމުން ދިވެހިރާއްޖެއަށް އޭގެ އެންމެ ބޮޑު ފައިދާއެއް ލިބޭނެ ގޮތަކަށް އަޅުގަނޑުމެންގެ މި ގަރާރު އެކުލެވިގެން ހުށަހެޅުމަށް އަޅުގަނޑުމެން މަސައްކަތް ކުރަނީ" ފިޝަރީޒް މިނިސްޓަރު ޒަހާ ވަހީދު ވިދާޅުވިއެވެ.
މި ބައްދަލުމުގައި ރާއްޖޭގެ ފަރާތުން އިސްކޮށް ހަރަކާތްތެރިވާ މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރގެ ޑިރެކްޓަރ ޖެނެރަލް ޑރ.ޝިހާމް އާދަމް ވިދާޅުވީ، މި ގަރާރަކީ އިންޑިއާ ކަނޑުގެ މަސްވެރިކަން ދެމެހެއްޓެނިވި ގޮތެއްގައި ކުރުމަށްޓަކައި އައްސޭރިފަށުގެ ޤައުމުތަކަށް މުޙިއްމު ގަރާރެއް ކަމަށެވެ.
އެންމެ ފަހުން އެކުލަވާލައިފައި އޮތް ދެލި ކޮޕީއާއި ބެހޭ ގޮތުން މަޝްވަރާކޮށް މާރޗްމަހު އޮންނަ ޓެކްނިކަލް ކޮމިޓީ އޮން އެލޮކޭޝަން ކްރައިޓީރިއާއަށް އަލުން ޕްރޮޕޯސަލް ހުށަހަޅައި މޭ މަހު އޮންނަ އިންޑިއަން އޯޝަން ޓޫނާ ކޮމިޝަނަށް ހުށަހަޅާ ގަރާރެއް ގޮތުގައި މި ގަރާރު ފާސް ކުރުމަށް މަސައްކަތް ކުރަމުންދާ ކަމަށްވެސް ޝިހާމް ވިދާޅުވިއެވެ.
މި ބައްދަލުވުމުގައި ދެކުނު އެފްރިކާ، ސީޝެލްސް، ޕާކިސްތާން، ބަންގްލަދޭޝް، އިންޑިޔާ، ކެންޔާ، މަޑަގަސްކަރަ، އީރާން، އިންޑޮނޭޝިއާ، ސޯމާލިއާ، މޮޒަމްބީކް، ކޮމޮރޮސް، މޮރިޝަސް، ސްރީ ލަންކާ، ތައިލެންޑް އަދި ޓެންޒޭނިއާ ގެ މަސްވެރިކަމުގެ ދާއިރާގެ އިސްވެރިން ބައިވެރިވެއެވެ.
އިންޑިއާ ކަނޑުގައިކުރާ ކަނޑުމަހުގެ މަސްވެރިކަން ދެމެހެއްޓެނިވި ގޮތެއްގައި ކުރެވޭ، ތިމާވެއްޓާއި ރައްޓެހި އަދި އިންޑިއާ ކަނޑުގެ އައްސޭރިފަށުގެ ގައުމުތަކަށް އެ މަސްވެރިކަމުގެ ނަފާ އެންމެ ފުޅާ ދާއިރާއެއްގައިކުރާ މަސްވެރިކަމެއްގެ ގޮތުގައި ހެދުމަށްޓަކައި ދިވެހިރާއްޖެއިން އިސްނަގައިގެން ބައިނަލްއަޤްވާމީ ފެންވަރުގައި ގިނަ މަސައްކަތައްތަކެއް ދަނީ ކުރެވެމުންނެވެ.