އިންޑިއާގެ އިޤްތިސާދު ދުނިޔެއަށް ހުޅުވާލައި، އެޤައުމުގައި ހުރި ވިޔަފާރީގެ ފުރުސަތުތަކާއި ގުޅޭގޮތުން މަޝްވަރާކުރުމަށް ބޭއްވި ސީ.އައި.އައި ޕާޓްނަރޝިޕް ސަމިޓުގައި ރާއްޖެއިން ބައިވެރިވެއްޖެއެވެ.
މިމަހުގެ 12އިން 13އަށް އިންޑިއާގެ ވިޔަފާރީގެ މައި މަރުކަޒު މުމްބާއީގައި ކުރިއަށްދިޔަ މި ސަމިޓުގައި ރާއްޖޭގެ ފަރާތުން ބައިވެރިވެފައިވަނީ، އިކޮނޮމިކް މިނިސްޓްރީގެ ސްޓޭޓް މިނިސްޓަރ ނީޒާ އިމާދެވެ. ސްޓޭޓް މިނިސްޓަރާއި އެކު ވުމެން އެސޯސިއޭޝަން އޮފް މޯލްޑިވްސްގެ ބައެއް މެމްބަރުން މި ފޯރަމްގައިވަނީ ބައިވެރިވެފައެވެ.
ސީ.އައި.އައި ޕާޓްނަރޝިޕް ފޯރަމްގައި ބައިވެރިވެ ސްޓޭޓް މިނިސްޓަރ ނީޒާ އިމާދުވަނީ ވާހަކަފުޅު ދައްކަވާފައެވެ. އެކަމަނާވަނީ ޤައުމުތަކުގެ މެދުގައި ވިޔަފާރީގެ ގުޅުން ބަދަހިކުރުމަށް އިޤްތިސާދީގޮތުން ހުރި ދަތިތައް ނައްތާލާ، ފަސޭހަކަމާއި އެކު ދޭދޭ ޤައުމުތަކުގެ މެދުގައި މުދާ ބަދަލު ކުރެވޭނޭ ނިޒާމްތަކުގެ މުޙިއްމުކަމާއި ގުޅޭގޮތުން އަލިއަޅުއްވާލާ ވާހަކަފުޅު ދައްކަވާފައެވެ.
މިއަހަރުގެ ޕާޓްނަރޝިޕް ފޯރަމްގައި ދުނިޔޭގެ ސާޅީހަކަށް ޤައުމުން ހާހެއްހާ މީހުން ބައިވެރިވެފައިވެއެވެ.