މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަށް ނިންމާފައިވާއިރު، އެކަން ކުރުމަށް ތިލަފުށި ފަޅުން ބިން ހިއްކާނެ ކަމަށް އެމްޕީއެލުން ބުނެފިއެވެ.
އެމްޕީއެލްގެ ސީއީއޯ ޝާހިދު އަލީ ވިދާޅުވީ އެމްޕީއެލް މާލެ ބަނދަރު ތިލަފުއްޓަށް ބަދަލުކުރުމަށް ކުރަންޖެހޭ މަސައްކަތް މިހާރު ފަށާފައިވާ ކަމަށާއި، މިއަހަރުތެރޭ އަމަލީ މަސައްކަތްތައް ފެށުމަކީ އަމާޒެއް ކަމަށެވެ.
"މާލޭ ވިޔަފާރި ބަނދަރު ޖާގަ ބޮޑު ކުރެވޭނެ އެއްވެސް ގޮތެއް ނެތް، ދެން ހިއްކޭނެ ތަނެއް ވެސް ނެތް، މިހާރު މިއަންނަ މުދަލަށް ބަލާއިރުވެސް މިއަށްވުރެ ތިން ގުނަ ހަތަރު ގުނަ ބޮޑު ޖާގައެއް ބޭނުންވޭ، ސަރުކާރުގެ ވިސްނުންފުޅަކީ މިއަހަރުތެރޭ ޓެންޑަރ ޑޮކިއުމެންޓާއި ހަމައަށް ދިޔުން، އަދި އަމަލީ މަސައްކަތް މިއަހަރު ތެރޭ ފެށުން" ޝާހިދު ވިދާޅުވިއެވެ.
އެމްޕީއެލް ބަނދަރު ތޮށްޖެހި، މުދާ ހުސްކުރުމަށް ގިނަ ދުވަސްތަކެއް ހޭދަވެއެވެ. އެކަމުގެ ހައްލަކީ ބަނދަރުގެ ޖާގަ ބޮޑުކުރުންކަމަށްވާއިރު، ބަނދަރުގެ ޖާގަ ބޮޑުކުރެވޭނެ އެއްވެސް ގޮތެއް ނެތެވެ. އެކަމަށް އޮތް ހަމައެކަނި ޙައްލަކީ ބަނދަރު އެހެން ތަނަކަށް ބަދަލުކުރުންކަމަށާއި އެގޮތުން މިހާތަނަށް ބެލިބެލުމުން ބަނދަރު ބަދަލުކުރުމަށް އެންމެ އެކަށީގެންވާ ތަނަކީ ތިލަފުށިކަމަށް އެމްޕީއެލްއިން ހާމަކުރެއެވެ.
އެމްޕީއެލްއިން ބުނެފައިވަނީ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަސައްކަތް ކުރިއަށް ގެންދިޔުމަށް ރާވާފައިވަނީ ފިޔަވަހިތަކަށް ބަހާލައިގެންކަމަށެވެ.