ކުރީގެ ޑިފެންސް މިނިސްޓަރ ކާނަލް ރިޓަޔަރޑް
މުޙައްމަދު ނާޘިމް ދިރިއުޅުއްވާ އެޕާޓްމަންޓް ބަލައި ފާސްކުރުމުގެތެރޭގައި ފުލުހުންނަށް
ފެނުނު ކަމަށް ބުނާ ޕެން-ޑްރައިވްގައި، ދިވެހި ދައުލަތުގެ އިސްވެރިންތަކަކަށް
ޖިސްމާނީ އަނިޔާއެއް ދިނުމަށް ރާވާފައިވާކަން ދޭހަވާފަދަ ލިޔުމެއް ފެނިފައިވާކަމަށް
ފުލުހުން ބުނެފިއެވެ.
މީގެ އިތުރުން، ފުލުހުންގެ އިންޓެލިޖެންސަށް
ލިބިފައިވާ މަޢުލޫމާތުގެ ތެރޭގައި، ކުރީގެ ޑިފެންސް މިނިސްޓަރ ނާޒިން،
އެކިފަރާތްތަކާއި ގުޅިގެން ރާއްޖޭގެ ވެރިކަން ބަދަލުކުރުމަށް ރާވަމުންދާކަމުގެ
މައުލޫމާތުވެސް ހިމެނޭކަމަށް ފުލުހުން މިރޭ ނެރުނު ނޫސްބަޔާނެއްގައި ތުހުމަތު
ކޮށްފައިވެއެވެ.
މިތުހުމަތުތަކާ ގުޅިގެން ފުލުހުން މިމައްސަލަ އިތުރަށް ތަޙްޤީޤު ކުރަމުންދާކަމަށް
ބުނެފައިވެއެވެ.
ދައުލަތާއި އިދިކޮޅު ހަރަކާތްތަކެއް ހިންގަން
ރާވަމުންދާކަމަށް ތުހުމަތުކޮށް، ރޭ ފުލުހުންވަނީ ކުރީގެ ޑިފެންސް މިނިސްޓަރ މުޙައްމަދު ނާޘިމް ހައްޔަރު
ކޮށްފައެވެ. އަދި މިއަދު ކްރިމިނަލް ކޯޓުންވަނީ، މިނިސްޓްރީ އޮފް ހޯމްއެފެއާޒުން
ކަނޑައަޅާ ތަނެއްގައި ބަންދުގައި ބަހައްޓައިގެން ތަޙުޤީޤު ކުރިޔަށް ގެންދިއުމަށް
ނާޘިމްގެ ބަންދަށް 15 ދުވަހުގެ މުއްދަތެއް ދީފައެވެ.
މީގެއިތުރުން ފުލުހުންވަނީ، މުޙައްމަދު ނާޘިމް
ދިރިއުޅުއްވާ އެޕާރޓްމަންޓުން ހަތިޔާރާއި ގޮވާތަކެތި ފެނިފައިވާކަމަށްބުނެ،
އެމައްސަލައިގައި ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށްވެސް ފޮނުވާފައެވެ.
މިރޭ ނާޒިމްގެ ލީގަލް ޓީމުން ބޭއްވި ނޫސްވެރިންގެ
ބައްދަލުވުމެއްގައި، ނާޒިމްގެ މައްޗަށް ކޮށްފައިވާ ތުހުމަތުތައް ވަނީ
ދޮގުކޮށްފައެވެ. އަދި މިމައްސަލާގައި ފުލުހުން ޢަމަލުކޮށްފައިވަނީ ޤާނޫނާ
ހިލާފަށްކަމަށް ތުހުމަތުކޮށް އެކަން ބަލާދިނުމަށް އެދި ޕޮލިސް އިންޓަގްރިޓީ ކޮމިޝަނަށް
ހުހަޅާނެކަމަށް ނާޒިމްގެ ވަކީލު މައުމޫން ހަމީދު ވިދާޅުވިއެވެ. މީގެއިތުރުން
ބަންދުގައި ބަހައްޓައިގެން ތަހްގީގު ކުރިއަށް ގެންދިއުމަށް 15 ދުވަހުގެ މުއްދަތެއް
ޖަހާދީފައިވާ މައްސަލަ ހައި ކޯޓުގައި އިސްއުނާފް ކުރާނެކަމަށް ވެސް ކުރީގެ ޑިފެންސް
މިނިސްޓަރ ގެ ވަކީލު މައުމޫން ހަމީދު ވިދާޅުވިއެވެ.