ޑައިވް ކުރުމާއި މޫދު ކުޅިވަރަށް ޚާއްޞަ ކޮށްގެން ދުނިޔޭގައި ބާއްވާ އެންމެ ބޮޑު ޓްރޭޑް ފެއަރ "ބޫޓު " ފެއަރގައި ރާއްޖެއިން ބައިވެރިވެއްޖެއެވެ.
"ބޫޓް ފެއަރ" ކުރިއަށްދާނީ މިމަހުގެ 20 އިން 28 ހަށް ޖަރުމަނުވިލާތުގެ ޑަސަލްޑޯފްގައެވެ. ފީނުމުގެ ފެއަރގެ ގޮތުގައި ދުނިޔޭގައި ބާއްވާ އެންމެ ބޮޑު ފެއަރ ބޫޓް ފެއަރ ބާއްވާތާ މީ ފަންސާސްވަނަ އަަހަރުއެވެ. މި ފަހަރުގެ ފެއަރގައި ފަސްދޮޅަސް އަށް ޤައުމަކުން އެއްހާސް ނުވަސްތޭކަ މީހުން ބައިވެރިވެއެވެ. މި ފަހަރުގެ ފެއަރގެ ތީމަކީ "360 ވޯޓަރ ސްޕޯޓްސް އެކްސްޕީރިއަންސް " މީ ތީމެވެ.
މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރު.ސީ ބުނީ މި ފަހަރުގެ ފެއަރގައި އެ ކޯޕަރޭޝަންއާއި އެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 5 ކުންފުންޏަކުން 10 ބައިވެރިން ބައިވެރިވެފައިވާކަމަށެވެ.
ރާއްޖެއަކީ ފަތުރުވެރިންގެ މެދުގައި ޑައިވިންއަށް މަޤްބޫލް މަންޒިލެކެވެ. އެގޮތުން ރާއްޖެއަކީ ޑައިވް ކުރުމަށް ކަމުދާ މަންޒިލެއްގެ ގޮތުގައި އިޝްތިހާރުކޮށް ޕްރޮމޯޓު ކުރުމަށް މި ފެއަރ އެހީތެރިވެދޭނެ ކަމަށް އެމްއެމްޕީއާރުސީން ދެކެއެވެ.
ޖަރުމަންވިލާތަކީ ރާއްޖެއަށް ދެވަނައަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެވެ. އެގޮތުން ހުސްވި އަހަރު ރާއްޖެއަށް ޒިޔާރަތްކޮށްފައިވާ ޖުމްލަ ފަތުރުވެރިންގެ ތެރެއިން 7.9 އިންސައްތައަކީ ޖަރުމަންވިލާތުގެ ފަތުރުވެރިންނެވެ.