އެންމެ ޒަމާނީ ޓެކްނޮލޮޖީ ބޭނުންކޮށްގެން މާލޭ ހުކުރު މިސްކިތުގެ ލޭޒަރ ސްކޭނެއް ހަދައިފިއެވެ. މިއީ ރާއްޖޭގެ ތާރީޚީ ބިނާއެއްގެ ލޭޒަރ ސްކޭނެއް ހެދި ފުރަތަމަ ފަހަރެވެ.
ތިމާވެއްޓާއި ސާރވޭ ކުރުމުގެ ޚިދުމަތްދޭ ކުންފުންޏެއްކަމަށްވާ ވޯޓަރ ސޮލިއުޝަންސްއިން މާލޭ ހުކުރު މިސްކިތާއި، އެ މިސްކިތު ގޯތި ތެރޭގައި ހިމެނޭ ތަކެތީގެ ލޭޒަރ ސްކޭނެއް ހަދައި، މިސްކިތާ ބެހޭގޮތުން ދިރާސާ ވީޑިއޯ ޑޮކިއުމެންޓްރީއެއް ތައްޔާރުކުރުމަށްފަހު މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖާ ވަނީ ހަވާލުކޮށްފައެވެ.
މިއީ މާލޭ ހުކުރު މިސްކިތް ފަދަ ދިވެހިރާއްޖޭގެ މުހިއްމު އާސާރީ ސަރަޙައްދެއްގެ މައުލޫމާތުގިނަ ދުވަހަށް ދެމިހުންނާނެ ގޮތަށް ތައްޔާރުކޮށް، އެ ތަކެތި އާންމުންނަށް ފަސޭހައިން ލިބޭނޭ ގޮތް ފަހިކޮށްދިނުމަށް ކޮށްފައިވާ މަސައްކަތެއްކަމަށް ހެރިޓޭޖް މިނިސްޓްރީން ބުނެއެވެ.
ލޭޒަރ ޓެކްނޮލޮޖީ ބޭނުންކޮށްގެން މިފަދަ އާސާރީ ތަންތަން ހުންނަ ގޮތް ދެނެގަނެ ސާރވޭ ކުރުމަކީ ދުނިޔޭގެ ކުރިއަރާފައިވާ ޤައުމުތަކުގައި ކުރަމުންއަންނަ ކަމެކެވެ. މި ސަރވޭ ގެ ސަބަބުން މިހާރު ހުކުރު މިސްކިތުގައި ހިރިގަލުން ހަދާފައިވާ ތަންތަނުގެ ހުރިހާ ލިޔެކިއުންތަކާއި ކެނޑުންތަކުގެ އިތުރުން އެހެނިހެން ތަފްސީލުތައް ވަނީ ޑިޖިޓަލްކޮށްފައެވެ.
މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖް އިން ބުނީ މި މަސައްކަތުގެ ސަބަބުން ރާއްޖޭގެ ހިރިގަލު މިސްކިތްތައް ދުނިޔޭގެ ތަރިކައިގެ ލިސްޓަށް އެރުވުމަށް ކުރާ މަސައްކަތަށް އަދި ހިރިގަލު މިސްކިތްތަކާ ބެހޭގޮތުން ދިރާސާ ކުރައްވާ ބޭފުޅުންނަށް މުހިންމު މަޢުލޫމާތުތަކެއް ލިބިގެންދާނެ ކަމަށެވެ. އަދި މިމަސައްކަތުގެ ސަބަބުން ކުރަހާ މީހުންނަށާއި، ޑިޒައިނަރުންނަށް ހުކުރު މިސްކިތުގެ އަސްލު ކުރެހުމުގެ ޗާޓުތައް ފޯރުކޮސްދެވޭނެ މަގު ފަހިިވެފައިވާކަމަށް އެ މިނިސްޓްރީން ބުނެއެވެ.
މި މަސައްކަތް ވޯޓަރ ސޮލިއުޝަންސްއިން ކޮށްފައިވަނީ ހިލޭ ސާބަހަށެވެ. 6 މަސްދުވަހަށް ދިގުދެމިގެންދިޔަ މިމަސައްކަތަށް ޖުމްލަ 400 ގަޑިއިރު ހޭދަވިކަމަށް އެކުންފުނިން ބުނެއެވެ.