މިއަހަރު ރާއްޖެއިން ޢުމްރާއަށް މީހުން ގެންދިޔުމަށް ޝައުގުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުޞަތު ހުޅުވާލައިފިއެވެ.
އިސްލާމިކް މިނިސްޓްރީން ބުނީ ޕްރޮޕޯޒަލްފޮތް މިމަހުގެ 27 އިން 30 ގެ ނިޔަލަށް ސަރުކާރު ބަންދުނޫން ކޮންމެ ދުވަހަކު އެ މިނިސްޓްރީން ގަންނަން ލިބޭނެކަމަށެވެ. ޕްރޮޕޯސަލް ފޮތެއްގެ އަގަކީ 5000 ރުފިޔާކަމަށް އިސްލާމިކް މިނިސްޓްރީން ބުނެއެވެ. އަދި
ޕްރޮޕޯޒަލްތައް ބަލައިގަތުމަށް ހަމަޖެހިފައިވަނީ އަންނަ މަހުގެ 5 ވަނަ ދުވަހުކަމަށާއި، ޕްރޮޕޯޒަލް ގަނެފައިނުވާ ކުންފުނިތަކާއި، ޕްރީ-ބިޑް މީޓިންގގައި ބައިވެރިނުވާ ކުންފުނިތަކުގެ ޕްރޮޕޯޒަލްތައް ބަލައި ނުގަންނާނެކަމަށް އިސްލާމިކް މިނިސްޓްރީން ބުނެއެވެ. މިކަމަށްޓަކައި ބާއްވާ ޕްރީ-ބިޑް މީޓިންގ ބޭއްވުމަށް ހަމަޖެހިފައިވަނީ މިމަހުގެ 31 ވަނަ ދުވަހުއެވެ.
އިސްލާމިކް މިނިސްޓްރީން ވަނީ "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު" އެކުލަވާލައި ގެޒެޓްގައި ޝާއިޢުކޮށްފައެވެ. އެ އުސޫލުގެ ދަށުން އުމްރާއަށް މީހުން ގެންދެވޭނީ 100 އިންސައްތަ ދިވެހިންގެ ހިއްސާ އޮންނަ ކުންފުންޏަކަށެވެ. އަދި ޢުމްރާއަށް މީހުން ގެންދިއުމަށް ހުށަހަޅަން ބޭނުންވާ ކޮންމެ ކުންފުންޏަކުންވެސް އެކަމުގެ ހުއްދައަށް އެދޭއިރު ކުންފުނީގެ މަޢުލޫމާތާއި، ޢުމްރާއަށް މީހުން ގެންދިއުމަށް އެދޭ އަދަދާއި، ޢުމްރާއަށްމީހުން ގެންދިއުމުގައި އެކުންފުންޏަކުން ޢަމަލުކުރާނެގޮތުގެ މުހިންމު ނުކުތާތައް އެކުލެވޭ ޕްރޮޕޯޒަލެއް އިސްލާމިކް މިނިސްޓްރީއަށް ހުށަހަޅަންޖެހެއެވެ.
މި އުސޫލުގެ ދަށުން އުމްރާއަށް މީހުން ގެންދިއުމުގެ މަސައްކަތް ކުރުމަށްޓަކައި ވަކި ޚާއްޞަ މިންގަނޑަކަށް ފެތޭގޮތަށް ޚިދުމަތްދޭ އޮފީހެއް ކޮންމެ ކުންފުންޏަކުން މާލެ ސިޓީގައި ޤާއިމުކުރަންޖެހެއެވެ.