މޯލްޑިވިއަނުން އިންޑިއާގެ ތްރިވަނަންތަޕޫރަމަށް ކުރާ ދަތުރުތަކަށް އެގާރަ އަހަރު ފުރުން ފާހަގަކޮށްފިއެވެ.
ޤައުމީ އެއަރލައިން މޯލްޑިވިއަނުން ވަނީ މިދުވަހާއި ގުޅުވައިގެން ކޭކް ފެޅުމާއި، އެއަރލައިންގައި ތްރިވަނަންތަޕޫރަމަށް ދަތުރުކުރި ފްލައިޓްގައި ތިބި ކުޑަ ކުދިންނަށް ހަދިޔާ ބަހާފައެވެ.
ރާއްޖޭގެ ޤައުމީ އެއަރލައިން، މޯލްޑިވިއަނުން އިންޑިއާގެ ތްރިވަނަންތަޕޫރަމަށް ދަތުރުތައް ފަށާފައިވަނީ 2008 ވަނަ އަހަރުގެ ޖެނުއަރީމަހުގެ 25 ވަނަ ދުވަހުއެވެ. ތްރިވަނަންތަޕޫރަމަކީ މޯލްޑިވިއަނުން ބައިނަލްއަޤްވާމީ ދަތުރުތައް ކުރަން ފެށި ފުރަތަމަ މަންޒިލެވެ.
މޯލްޑިވިއަން ހިންގާ ކުންފުނި އައިލެންޑް އޭވިއޭޝަނުންވަނީ ފާއިތުވެދިޔަ 11 އަހަރު ދުވަހުގެ ތެރޭގައި ތްރިވަނަންތަޕޫރަމަށް ކުރާ ދަތުރުތައް ފުޅާކޮށް ބޮޑެތި ކުރިއެރުންތަކެއް ހޯދާފައެވެ. އައިލެންޑް އޭވިއޭޝަނުން އެންމެ ފުރަތަމަ ތްރިވަނަންތަޕޫރަމަށް ކުރި ދަތުރުތަކުގައި ބޭނުންކޮށްފައިވަނީ، 50 މީހުންގެ ޖާގައިގެ ޑޭޝް8 މަތިންދާބޯޓެވެ. އަދި އޭރު ކުރަމުން އައީ ހަފްތާއަކު އެންމެ ދަތުރެކެވެ. އެހެން ނަމަވެސް މިހާރު ހަފްތާއަކު ހަތަރު ފްލައިޓަށް އިތުރުވެފައިވާއިރު، ދަތުރުތައް ކުރުމަށް ޑޭޝް8 މަތިންދާބޯޓުގެ އިތުރުން، އެއަރބަސް މަރުކާގެ ބޯޓުވެސް ބޭނުންކުރެއެވެ. މޯލްޑިވިއަނުން ތްރިވަނަންތަޕޫރަމަށް ކުރާ ދަތުރުތަކުގައި ބޭނުންކުރާ އެއަރބަސް މަރުކާގެ ބޯޓަކީ 200 މީހުންގެ ޖާގައިގެ ބޯޓަކާއި 150 މީހުންގެ ޖާގައިގެ ބޯޓެކެވެ.
އައިލެންޑް އެވިއޭޝަނުންދަނީ ހދ ހަނިމާދޫ އިންޓަރނޭޝަނަލް އެއާޕޯޓުންވެސް ތްރިވަނަންތަޕޫރަމަށް ޝެޑިއުލް ދަތުރުތައް ބާއްވަމުންނެވެ. އެގޮތުން ހަނިމާދޫ އެއަރޕޯޓުން ހަފްތާއަކު ދެ ދަތުރު ކުރާއިރު މި ދަތުރުތަކުގައި ބޭނުންކުރަނީ ޑޭޝް 8 މަރުކައިގެ 50 މީހުންގެ ޖާގައިގެ ބޯޓެކެވެ.