އިންޑިއާއާ ރާއްޖެއާ ދެމެދު އޮތް ގުޅުމަކީ ދުވަހަކުވެސް ކެނޑިގެންދާނެ ގުޅުމެއް ނޫން ކަމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވެއްޖެއެވެ.
އިންޑިއާގެ 70 ވަނަ ޖުމްހޫރީ ދުވަހާ ގުޅުވައިގެން ބޭއްވި ހަރަކާތް ޝަރަފުވެރިކޮށްދެއްވާ ވާހަކަދައްކަވަމުން ނައިބްރައީސް ފައިޞަލް ނަސީމް ވިދާޅުވީ ދިވެހިރާއްޖެ ތަރައްޤީކުރުމުގައި އިންޑިއާއިން އިސް ދައުރެއް އަދާކުރާކަމަށެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި އެމަނިކުފާނު ވަނީ އިންޑިއާ އާއި ރާއްޖެއާ ދެމެދުގައި އުފެދިފައިވާ ގާތް ގުޅުމުގެ މައްޗަށް އަލިއަޅުއްވާލައްވާފައެވެ. އެގޮތުން އެމަނިކުފާނު ވިދާޅުވީ އިންޑިއާ އާއި ރާއްޖޭގެ ގުޅުން ބިނާވެފައި ވަނީ ހަމައެކަނި ދެ ޤައުމެއްގެ ގުޅުން އޮންނަ މިންވަރަށް ނޫންކަމަށާއި، އެގުޅުމަކީ އެއަށްވުރެ މާ ގާތް ގުޅުމެއް ކަމަށެވެ.
މި މޭރުމުން ވާހަކަފުޅު ދައްކަވަމުން އެމަނިކުފާނު ވިދާޅުވީ ދެޤައުމުގެ ގުޅުން ބިނާވެގެން ގޮސްފައިވަނީ ވޭތުވެ ދިޔަ އަހަރުތަކުގައި ދެ ޤައުމުން ކޮށްފައިވާ ތަޖުރިބާތަކުގެ މައްޗަށާއި، ޒަމާންވީ އާދަކާދަތަކުގެ މައްޗަށާއި، އެއްޤައުމުން ކުރާ ކަންތައްތައް އަނެއްޤައުމުން ބަލައިގަންނަމުންދާ މިންވަރުގެ މައްޗަށްކަމުގައެވެ.
ދިވެހިރާއްޖެ އާއި އިންޑިއާ އާއި ހިއްސާކުރާ އެއްގޮތް ކަންތައްތަކުގެ މައްޗަށް ބައްލަވާލައްވަމުން ރައީސުލްޖުމްހޫރިއްޔާގެ ނައިބު ވިދާޅުވީ ދެޤައުމުގެ ޤާނޫނު އަސާސީ އެކުލަވާލެވިފައި ވަނީ ރައްޔިތުންގެ ޙައްޤުތަކާއި، މިނިވަންކަން ނަގަހައްޓައި ޑިމޮކްރަޓިކް މުޖުތަމައެއް ބިނާކުރުމަށާއި، އިޖުތިމާޢީ ފޭރާން ބަލިކަށި ވެގެން ނުދާނޭފަދަ ގޮތަކަށް ކަމަށެވެ.
ރައީސުލްޖުމްޙުރިއްޔާގެ ނައިބުގެ ވާހަކަފުޅުގައި ވިދާޅުވީ އިންޑިއާއިން އަބަދުވެސް ރާއްޖެއިން ބޭނުންވެއްޖެ ކޮންމެ ހިނދެއްގައި ގާތް ރަހުމަތްތެރިއެއްގެގޮތުން ރާއްޖެއަށް ދީލަތި ކަމާއެކު އެހީތެރިކަން ފޯރުކޮށްދޭކަމަށެވެ. މީގެ އިތުރުން އެމަނިކުފާނު ވަނީ އިންޑިއާއިން ބަހައްޓަވާ ގާތްކަން ރާއްޖެއިން އަދި މި ސަރުކާރުން ބަލައިގަންނަކަމުގައި ވިދާޅުވެފައެވެ. އަދި ކުރިއަށް އޮތް ދުވަސްތަކުގައި ދެޤައުމަށް ފައިދާ ވާނެފަދަ ކަންކަމުގައި އެއްބާރުލުން ދެއްވާނެކަމުގެ ޔަޤީންކަންވެސް އެމަނިކުފާން ވަނީ އަރުވާފައެވެ.
"މިގޮތުން ޚާއްސަކޮށް ތަޢުލީމީ ދާއިރާއާއި ސިއްޙީ ދާއިރާއާއި ވިޔަފާރީގެ ދާއިރާއިންވެސް ރާއްޖެއަށް އެހީތެރިވެދެއްވާކަމަށް ވިދާޅުވިއެވެ. މީގެ އިތުރުން ރާއްޖެއަށް ދިމާވާ ކޮންމެ ނުތަނަވަސް ދަނޑިވަޅެއްގައި ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށްޓަކައި އެހީތެރިވެދެއްވާ" ނައިބްރައީސް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފިރު އަކިލޭސް މިސްރާވެސް ވަނީ ރާއްޖެއާއި އިންޑިއާއާ ދެމެދު ޒަމާނުއްސުރެ އޮތް ގާތް ގުޅުމުގެ މައްޗަށް އަލިއަޅުވާލައްވާ ވާހަކަދައްކާފައެވެ. މިގޮތުން ސަފީރު ކަމުގައި ރާއްޖޭގައި ހެދަކުރި ދުވަސްތަކުގައި ރާއްޖެއާއި އިންޑިއާގެ ގުޅުމުގެ މައްޗަށް އަލިއަޅުވާލައްވާ ވިދާޅުވީ ރާއްޖެއާއި އިންޑިއާގެ ގުޅުމަކީ ބަޔާންކޮށްދޭވަރަށް ވުރެވެސް ގާތްގުޅުމެއްކަމަށެވެ.
މި ރަސްމިއްޔާތުގައި ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމްއާއި މުޙައްމަދު ނަޝީދުގެ އިތުރުން ރައްޔިތުންގެ މަޖިލީހުގެ ރައީސް ޤާސިމް އިބްރާހިމް ބައިވެރިވެވަޑައިގެންނެވިއެވެ. އަދި ރަސްމިއްޔާތުގައި ރާއްޖޭގައި ދިރިއުޅޭ އިންޑިއާގެ ގިނަ އަދަދެއްގެ ރައްޔިތުންވެސް ބައިވެރިވެފައިވެއެވެ. މި ރަސްމިއްޔާތުގައި ވަނީ އިންޑިއާގެ ސަޤާފީ ހަރަކާތްތައް ދައްކާލާފައެވެ.