ދަނޑުވެރިކަމުގެ ދާއިރާއިން ދިވެހިންނަށް ބޭނުންވާ ތަމްރީނު ދިނުމާއި ގުޅޭގޮތުން އިންޑިއާގެ ނޭޝަނަލް ސްކިލް ޑިވެލޮޕްމަންޓް ކޯރޕަރޭޝަނުގެ ބޭފުޅުންނާއި ފިޝަރީޒް މިނިސްޓަރ ޒަހާ ވަހީދު މަޝްވަރާކުރައްވައިފިއެވެ.
ފިޝަރީޒް މިނިސްޓްރީގައި ކުރިއަށްދިޔަ މި ބައްދަލުވުމާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އެ މިނިސްޓްރީގެ ޕާރމަނަންޓް ސެކްރެޓަރީ ޑރ. އާއިމިނަތު ޝާފިއާ ވިދާޅުވީ މި ބައްދަލުވުމުގައި އެންއެސްޑީސީގެ ބޭފުޅުންނަށް ރާއްޖޭގެ ދަނޑުވެރިން ތަމްރީނުކުރުމަށް ބޭނުންވާ ދާއިރާތައް ހިއްސާކޮށްފައިވާކަމަށެވެ. މި ތަމްރީނުތައް ރާއްޖޭގައި ހިންގާނޭ ގޮތުގެ ޕްރޮގުރާމެއް އެ ކޯރޕަރޭޝަނުން އެކުލަވާލާނެ ކަމަށާއި، ރާއްޖޭގެ އިތުރުން އިންޑިއާގައިވެސް ތަމްރީނުތައް ކުރިއަށްގެންދިއުން އެކަށީގެންވާ ކަމަށް ޝާފިއާ ވިދާޅުވިއެވެ.
ތަމްރީން ޕްރޮގާމްތައް ހިންގާނެ ގޮތުގެ ޕްލޭނެއް އެކުލަވާލުމުގެ މަސައްކަތް މިއަހަރުގެ ސެޕްޓެމްބަރުމަހުގެ ނިޔަލަށް ނިމޭނޭކަމަށް އެންއެސްޑީސީން ބުނެފައިވާ ކަމަށްވެސް ޝާފިއާ ވިދާޅުވިއެވެ.
ނޭޝަނަލް ސްކިލް ޑިވެލޮޕްމަންޓް ކޯރޕަރޭޝަނަކީ ފުޅާ ދާއިރާއެއްގައި އިންޑިއާގައި ތަމްރީން ޕްރޮގްރާމްތައް ހިންގަމުން އަންނަ ބައެކެވެ. އެގޮތުން މިހާތަނަށް އެ ކޯރޕަރޭޝަނުންވަނީ 5.2 މިލިއަން މީހުނަށް ތަމްރީނުތައް ހިންގާފައެވެ.