އެލައިޑް އިންޝުއަރެންސްގެ މެނޭޖިންގ ޑިރެކްޓަރކަމުގެ މަގާމަށް މުޙައްމަދު ޝަފާޒް އައްޔަންކޮށްފިއެވެ.
އެސްޓީއޯއިން ނެރުނު ނޫސްބަޔާނެއްގައި ބުނެފައިވަނީ އެލައިޑް އިންޝުރެންސް ކޮމްޕެނީ އޮފް ދަ މޯލްޑިވްސްގެ މެނޭޖިންގޑިރެކްޓަރކަމުގެ މަޤާމުގައި ހުންނެވި އަޙްމަދު އަމީލް އެމަގާމުން އިސްތިއުފާ ދެއްވުމާ ގުޅިގެން، އެމަގާމަށް މުޙައްމަދު ޝަފާޒް މއ.ކަނޯވާ އައްޔަންކުރުމަށް އެސްޓީއޯގެ ޑިރެކްޓަރުންގެ ބޯޑުން ނިންމާފައިވާކަމަށެވެ.
މުޙައްމަދު ޝަފާޒް އެލައިޑް އިންޝުރެންސްގައި ޚިދުމަތްކުރައްވާތާ 24 އަހަރަށްވުރެ ދިގު މުއްދަތެއް ވަނީ ވެފައެވެ. އަދި މިއަދާ ހަމައަށް ހުންނެވީ އެ ކުންފުނީގެ އެގްޒެކެޓިވް ޑިރެކްޓަރ އަދި ޑެޕިއުޓީ މެނޭޖިންގ ޑިރެކްޓަރކަމުގެ މަގާމުގައެވެ.
ރާއްޖޭގައި ފުޅާ ދާއިރާގެ އިންޝުއަރެންސްގެ ހިދުމަތް ދެމުން އަންނަ އެލައިޑް އިންޝުއަރެންސް ކުންފުންޏަކީ ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯގެ ސަބްސިޑަރީ ކުންފުންޏެކެވެ.