ރާއްޖޭގެ އިންޝުއަރެންސް ސިނާޢަތް ފުޅާކޮށް ހަރުދަނާކުރުމަށްޓަކައި އިންޝުއަރެންސްއާ ގުޅޭ ޤާނޫނެއް އެކުލަވާލާފައިވާކަމަށާ އެޤާނޫން ފާސްކުރުމަށް ރައްޔިތުންގެ މަޖިލީހަށް ފޮނުވާފައިވާ ކަމަށް އެމްއެމްއޭގެ ގަވަރނަރު އަހުމަދު ނަޞީރު ވިދާޅުވެއްޖެއެވެ.
އެލައިޑު އިންޝުއަރެންސްގެ ތިރީސް ހަތަރުވަނަ އަހަރީދުވަހާ ގުޅުވައިގެން ބޭއްވި ހަފްލާ ޝަރަފްވެރިކޮށްދެއްވައި ދެއްކެވި ވާހަކަފުޅުގައި ގަވަރނަރ ނަޞީރު ވިދާޅުވީ އިންޝުއަރެންސް ކުންފުނިތަކުގެ މާލީ ޙާލަތު ދެނެގަތުމަށްޓަކައި މަސައްކަތްކުރަމުންދާ ކަމަށެވެ.
ގަވަރނަރ ވިދާޅުވީ އިންޝުއަރެންސްގެ ދާއިރާ ކުރިއެރުވުމަށް ގިނަ މަސައްކަތްތަކެއް ކުރަމުންދާ ކަމަށާއި މާލީ ދާއިރާތަކުގެ ކޯރޕަރޭޓް ގަވަރނަންސް ރެގިއުލޭޝަނެއްގެ އެކުލަވާލުމުގެ މަސައްކަތައްވެސް އެމްއެމްއޭއިން ކުރަމުންދާ ކަމަށެވެ. އެގޮތުން އައިއެމްއެފްގެ އެހީގައި ވަރަށްއަވަސް މުސަތަޤްބަލެއްގައި ކޯރޕަރޭޓް ގަވަރނެންސްގެ ރެގިއުލޭޝަންއެއް ނެރޭނެކަމަށްވެސް ގަވަރނަރ ވިދާޅުވިއެވެ.
މީގެއިތުރުން އިންޝުއަރެންސާ ގުޅުންހުރި ކަންތައްތަކުގައި އެމްއެމްއޭއަށް ލަފާދިނުމަށް އިންޝުއަރެންސް އެޑްވައިޒަރީ ކައުންސިލްއެއް އުފެއްދުމުގެ މަސައްކަތްވެސް ކުރަމުންދާކަމަށް ގަވަރނަރ ވިދާޅުވިއެވެ.
އިންޝުއަރެންސްގެ ސިނާޢާތުގެ ވާދަވެރިކަން ރާއްޖޭގައި އިތުރުވަމުންދާއިރު އެލައިޑު އިންޝުރެންސް ބާރު ދުވެއްޔެއްގައި ކުރިއަރަމުންދާކަން ގަވަރނަރ ފާހަގަކުރެއްވިއެވެ. އަދި ކުރިމަގުގައި އެލައިޑް އިންޝުއަރެންސް ލިސްޓެޑް ކުންފުންޏަކަށް ބަދަލުވެ، ރައްޔިތުންނަށް އެކުންފުނީގެ ޙިއްސާ ވިއްކަން ފަށާދުވަހެއް ދެކެވަޑައިގަންނަވަން ބޭނުންވާކަމަށް ގަވަރނަރ ވިދާޅުވިއެވެ.
އެލައިޑު އިންޝުއަރންސްގެ 34ވަނަ އަހަރީ ދުވަހުގެ ހަފްލާ ބޭއްވީ ދަރުބާގޭގައެވެ. މިޙަފްލާގައިވަނީ އެކުފުނީގެ އިތުރު އިންޝުއަރެންސް ޕެކޭޖްތަކެއް ތަޢާރަފްކޮށްފައެވެ. އަދި މިދިޔައަހަރުގެ އެންމެ ރަގަޅު އެޖެންޓުންނާއި ބްރޯކަރުން ފާހަގަކޮށް، އެފަރާތްތަކަށް ވަނީ ހަނދާނީ ފިލާ އަރުވާފައެވެ.