މާލެއާއި ވިލިމާލެއާ ދެމެދު އެމްޓީސީސީން ދެމުންގެންދާ ފެރީގެ ޚިދުމަތުގެ ފެންވަރު ރަގަޅުކޮށް ޚިދުމަތް ހޯދާ ފަރާތްތަކަށް ފަސޭހަކޮށްދިނުމުގެ ގޮތުން 'ދަތުރު ކާޑު' ތައާރަފްކޮށްފިއެވެ.
ވިލިމާލެއަށް ކުރާ ދަތުރުތަކަށް ދަތުރު ކާޑު ރަސްމީކޮށް ތައާރަފް ކޮށްފައިވަނީ އެމްޓީސީސީން ވިލިމާލެއަށް ދޭ ފެރީގެ ހިދުމަތަށް އަށާރައަހަރުފުރުން ފާހަގަކުރުމަށް ރޭ ވިލިނގިލި މާލެ ފެރީ ޓަރނަލް ސަރަހައްދުގައި ބޭއްވި ހަފްލާގައެވެ.
ވިލިމާލެއަށް ދޭ ފެރީގެ ޚިދުމަތުގައި ދަތުރުކާޑު ބޭނުންކުރަން ފެށުމާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އެމްޓީސީސީގެ ޓްރާންސްޕޯޓް ޑިވިޝަންގެ އެސިސްޓަންޓް ޖެނެރަލް މެނޭޖަރ މުހައްމަދު ނާޒިމް ވިދާޅުވީ، ކަސްޓަމަރުންނަށް ފަސޭހަކޮށްދިނުމުގެ ގޮތުން މި ޚިދުމަތަށް މިހާރު އޮންލައިންކޮށްވެސް އެޕްލައި ކުރެވޭނެ ކަމަށެވެ. އަދި ބޭނުންވާ ފެރީ ޓަރމިނަލެއް އިހްތިޔާރުކޮށް، އެތަނަކުން ކާޑު ނެގޭނޭކަމަށެވެ.
ނާޒިމް ވިދާޅުވީ އެމްޓީސީސީން ހުޅުމާލެއަށް ދޭ ފެރީގެ ޚިދުމަތުގައި ދަތުރު ކާޑު ބޭނުންކުރުން ވަގުތީގޮތުން މިހާރު ހުއްޓާލާފައިވާ ކަމަށެވެ. މިގޮތުން މިމަހުގެ ތެރޭގައި އަލުން މި ޚިދުމަތް ހުޅުމާލެ ފެރީގެ ދަތުރުތަކަށް ތައާރަފްކުރާއިރު، އެ ކާޑު ބޭނުންކޮށްގެން ވިލިމާލެއަށްވެސް ދަތުރުކުރެވޭނެ ކަމަށެވެ.
އެމްޓީސީސީން ގެންދަނީ، އެންމެ ކާޑެއް މެދުވެރިކޮށް އެކުންފުނީގެ ދަތުރުފަތުރުގެ ހުރިހާ ޚިދުމަތެއް ފައްސޭހަކަމާއެކު ލިބޭނެ އިންތިޒާމެއް ހަމަޖެއްސުމަށް މަސައްކަތްކުރަމުންނެވެ. އެގޮތުން ކުރިމަގުގައި ފެރީގެ ހިދުމަތުގެ އިތުރުން، ބަސް ދަތުރުތަކަށްވެސް އެ ކާޑު ބޭނުން ކުރެވޭނެ ކަމަށް ނާޒިމް ވިދާޅުވިއެވެ.
އެމްޓީސީސީން ވިލިމާލެއަށް ދޭ ފެރީގެ ހިދުމަތަށް 18 އަހަރުފުރުން ފާހަގަކުރުމަށް ބޭއްވި ހަފްލާގައި މާލެ ސިޓީ މެޔަރ ޝިފާ މުހައްމަދުގެ އިތުރުން އެމްޓީސީސީގެ ގިނަ އަދަދެއްގެ މުވައްޒަފުން ބައިވެރިވެފައިވެއެވެ.