އިންޑިއާއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އަންނަ އަހަރުގެ ނިޔަލަށް ދެ ގުނައަށް އިތުރުކުރާނޭކަމަށް އެމްއެމްޕީއާރުސީން ހާމަކޮށްފިއެވެ.
ފަތުރުވެރިކަމާއި ގުޅޭ ޚަބަރު ގެނެސްދޭ އިންޑިއާގެ ވެބްސައިޓެއް ކަމަށްވާ ޓްރެވަލް ބިޒް މޮނިޓަރ ޑޮޑް ކޮމްއަށް ދެއްވި އިންޓަރވިއުއެއްގައި އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވެފައިވަނީ، އިންޑިއާގައި ރާއްޖެ އިތުރަށް އިޝްތިހާރުކުރުމަށްޓަކައި އިންޑިއާގެ 4 ސިޓީއެއް ހިމެނޭހެން ރޯޑް ޝޯވް އެއް ބޭއްވުމަށް ހަމަޖެހިފައިވާ ކަމަށާއި، ކުރިއަށްއޮތްތަނުގައި އޮންލައިންކޮށް ރާއްޖެ އިޝްތިހާރުކުރުންވެސް އިތުރުކުރާނޭކަމަށެވެ.
ޠައްޔިބު ވިދާޅުވީ ރާއްޖެއާއި ގުޅޭގޮތުން ފުރިހަމަ މައުލޫމާތު އިންޑިއާގެ ގިނަ މީހުންނަށް ލިބިފައިނުވާކަން ފާހަގަކުރެވޭކަމަށެވެ. އެގޮތުން ރާއްޖެއަކީ ހަމައެކަނި މަތީ ފަންތީގެ ޙިދުމަތްދޭ، އަގު ބޮޑު މަންޒިލެއް ކަމަށް ގިނަ ބަޔަކު ދެކޭ ކަމަށާއި އެހެން ނަމަވެސް ހަޤީޤަތަކީ މަތީ ފަންތީގެ ޙިދުމަތްދޭ ރިސޯޓްތަކުގެ އިތުރަށް ރާއްޖޭގައި 500 އަށްވުރެގިނަ ގެސްޓްހައުސް ހިންގަމުންދާ ކަން ޠައްޔިބު ފާހަގަކުރެއްވިއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އިންޑިއާއަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ 5 ޤައުމުގެ ތެރޭގައި ހިމެނޭ ޤައުމެކެވެ. އެގޮތުން ހުސްވި އަހަރު އެޤައުމުން ރާއްޖެއަށް 90،400 ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ 2017ވަނަ އަހަރާ އަޅާބަލާއިރު %9 އިތުރު އަދަދެކެވެ.