މާލޭގައި މީހުން ދިރިއުޅެމުންދާ ފްލެޓްތަކުގެ ތެރެއިން މާލެ ހިޔާ 1ގެ ކުނީގެ މައްސަލަ ހައްލުނުވެ ގިނަދުވަސްވުމުގެ ސަބަބުން ކުނިތައް ފުޅައަޅައި އެއިންދުވާ ނުބައިވަހާއެކު މާލެ ހިޔާ1 ގައި ދިރިއުޅޭ ރައްޔިތުންނަށް ޢާއްމު އުނދަގުލަކަށްވެއްޖެއެވެ.
މާލެ ހިޔާގެ ފުލެޓްތަކަކީ އެކި ދުވަސްވަރު އެކިކަހަލަ މައްސަލަތައް ކުރިމަތިވަމުން އަންނަ ފްލެޓްތަކެކެވެ. މިގޮތުން އެޕާޓްމަންޓްތަކުގައި ފެންބޮޑުވުމާއި ޢިމާރާތަށް އެކިވަރުގެ ގެއްލުންތައް ލިބިއެކަން ޙައްލުނުވުމާއި، ތަނުގެ މަރާމާތުގެ މަސައްކަތް ނުކުރެވުންފަދަ އެތައްކަމެއް ފާހަގަކުރެވެއެވެ.
މިހާރު އަނެއްކާވެސް މިވަނީ މިފަދަ އެހެން މައްސަލައެއް ކުރިމަތިވެފައެވެ. އެއީ ކުނީގެ މައްސަލައެވެ.
މާލޭ ހިޔާ 1 ގެ ފްލެޓުތަކުގައި ދިރިއުޅޭ މީހުން ކުނި ޖަމާކުރުމަށް ޚާއްސަކޮށްފައިވާ ގޮޅީގައި ގިނަދުވަސްތަކެއް ކުނި ޖަމާކޮށް އެތަން ސާފުނުކުރުމުގެ ސަބަބުން މިހާރު ވަނީ އެތަންފުރި ބަންޑުންވާ ހިސާބަށް ގޮސްފައެވެ. އެތަނުގައި ހުރި ކުނިތައް ކުނިވެ ފުޅައަޅާފައިވައިރު، އެތަނުން ދުވާވަހުން ކެތްނުވާވަރުވަނީ ވެފައެވެ.
މީގެ ސަބަބުން އެތަނުގެ އެކި އެޕާޓްމަންޓުތަކަށް ވަރަށްބޮޑަށް އުނދަގޫވެ ރައްޔިތުންދަނީ ކަންބޮޑުވުން ފާޅުކުރަމުންނެވެ. އެތައްބަޔަކު ދިރިއުޅޭ މިޢިމާރާތުގައި ދުވާލެއްގެ މައްޗަށް އެތަން ކުންޏެއް އުފެދޭއިރު، ކުނި ނުނަގަ ގިނަ ދުވަސްތަކެއް ވުމަކީ ވަރަށްބޮޑު މައްސަލައެއްކަމަށް ރައްޔިތުން ދެކެއެވެ.
މިތަނުގައި ދިރިއުޅޭ ރައްޔިތުން ބުނާގޮތުގައި އެތަނުން ކުނި ނުނަގާތާ މިހާރުވެސް މެދުނުކެނޑި 8 ދުވަސް ވެފައިވެއެވެ. މިކަން ކަމާބެހޭ ފަރާތްތަކަށް އެންގުމަށް މަސައްކަތްކޮށްފައިވާކަމަށްވެސް އެމީހުން ބުނެއެވެ. މީގެ ކުރިން މާލޭ މުނިސިޕަލްޓީން މިތަންތަން ބަލަހައްޓަމުންދިޔައިރު މިހާވަރުވެފައިނުވާކަމަށާ ނަމަވެސް ސިޓީ ކައުންސިލްއައިސް ވިލެޖް ނަމަކަށް ކިޔާ ކުންފުންޏަކާ ހަވާލުކުރިފަހުން މިފަދަ މައްސަލަތައް ތަކުރާރުވަމުންދާކަމަށް އެމީހުން ބުނެއެވެ.
މިކަމާ ގުޅޭގޮތުން ޕީއެސްއެމް ނިއުސްއިން ކުރި ސުވާލަކަށް ޖަވާބު ދެއްވަމުން މާލެސިޓީ ކައުންސިލްގެ ޑެޕިއުޓީ މެޔަރު ޝަމާއު ޝަރީފް ވިދާޅުވީ މިހާރުގެ ޙާލަތަށް އެތަން ގޮސްފައިވަނީ ބަޔަކު ގަސްދުގައި އެ ގޮޅިއަށް ކުނިއަޅާފައިވުމުގެ ސަބަބުންކަމަށެވެ. އެތަނުގައި ދިރިއުޅެމުންދާ ރައްޔިތުންނަށް އަންގާފައިވާނީ ކޮތަޅުގައި ރަނގަޅަށް ބަންދުކުރުމަށްފަހު ކުނިއެޅުމަށްކަމަށާ ނަމަވެސް އެއާޚިލާފަށް ކަންތައް ކުރަމުންދާކަން ޝަމާއު ފާހަގަކުރެއްވިއެވެ. ޝަމާއުވަނީ މިކަން ހައްލުކުރުމަށް ސިޓީކައުންސިލުން މަސައްކަތް ފަށާފައިވާކަމަށާއި މީގެފަހުން މިފަދަކަމެއް ކުރިމަތިނުވާނެކަމުގެ ޔަޤީންކަން ދެއްވާފައެވެ.
މާލެ ހިޔާ 1 ގައި ދިމާވި ކުނީގެ މައްސަލަ އާ ގުޅިގެން އެތަނުގައި ދިރިއުޅެމުންދާ ރައްޔިތުން ކަންބޮޑުވުން ފާޅުކޮށްފައިވާއިރު މާލެ ސިޓީ ކައުންސިލުން ވަނީ މިއަދު ހަވީރު އެތަން ސާފުކުރުމުގެ މަސައްކަތް ފަށާފައެވެ. އަދި ކުނިތައް ނެގުމަށްފަހު ގެއްލުން ނުވާނެފަދަ ކެމިކަލް ބޭނުންކޮށްގެން އެތަން ސާފުކުރާނެކަމަށްވެސް މާލެ ސިޓީ ކައުންސިލްއިން މަޢުލޫމާތުދެއެވެ.