ޑްރައިވިންގ ލައިސަންސް ދޫކުރުމުގައި މިހާރު ގެންގުޅޭ އުޞޫލް އިތުރަށް ހަރުދަނާކުރުމަށް މަސައްކަތް ކުރަމުންދާކަމަށް ޓްރާންސްޕޯޓް އޮތޯރިޓީން ބުނެފިއެވެ.
ޓްރާންސްޕޯޓް އޮތޯރިޓީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެއޮތޯރިޓީގެ އެސިސްޓެންޓް ޑިރެކްޓަރު ހުސައިން ނަޒީރު ވިދާޅުވީ، ލައިސަންސް ދޫކުރުމުގެ ކަންކަން ހަރުދަނާކުރުމަށްޓަކައި ޔުނައިޓެޑް ނޭޝަންސްގެ ރޯޑް ޓްރެފިކް ކޮންވެންޝަންގައި ބައިވެރިވުމަށް މަސައްކަތް ކުރަމުންދާކަމަށެވެ. މި ކޮންވެންޝަނުގައި ބައިވެރިވުމާއެކު ޑްރައިވިންގ ލައިސަންސް އަލަށް ނަގާ މީހުނަށް އަމާޒުކޮށްގެން ޚާއްސަ ތަމްރީން ޕްރޮގްރާމްތަކެއް ކުރިއަށްގެންދާނެކަމަށް ނަޒީރު ވިދާޅުވިއެވެ.
ނަޒީރު ވިދާޅުވީ، މި ތަމްރީން ޕްރޮގްރާމްތައް ކުރިއަށް ގެންދިޔުމަށްޓަކައި ވާންޖެހޭ ތައްޔާރީތައް ވަމުންދާކަމަށާއި، މިކަމަށްޓަކައި ޚާއްސަ ސިލަބަސްތަކެއް އެކުލަވާލާފައިވާކަމަށެވެ.
"ޔުނައިޓެޑް ނެޝަންސްގެ ކޮންވެންޝަނެއްކަމަށްވާ ރޯޑް ޓްރެފިކް ކޮންވެންޝަންގައި ބައިވެރިވުމަށްޓަކައި ކުރަންޖެހޭ މަސައްކަތްތައް ކުރަމުން މިދަނީ. މީގައި ބައިވެރިވުމާ ހިސާބުންފެށިގެން ރާއްޖޭގައި ލައިސަންސް ނަގާއިރު ތަމުރީނު ޕްރޮގްރާމެއް ކުރިއަށްގެންދާނެ. މިކަމަށް ތައްޔާރުވުމުގެ ގޮތުން މިހާރުވެސް އެބަހުރި ސިލަބަސްތަކެއް އެކަށައަޅާފަ." ޓްރާންސްޕޯޓުގެ އެސިސްޓެންޓް ޑިރެކްޓަރު ހުސައިން ނަޒީރު، ވިދާޅުވިއެވެ.
ރޯޑް ޓްރެފިކް ކޮންވެންޝަނަކީ މަގުމަތީގެ ސަލާމަތާއި ރައްކާތެރިކަން ކަށަވަރުކޮށްދީ، ޓްރެފިކް ޤާނޫނުތަކާއި ޤަވާއިދުތަކާގުޅޭގޮތުން ބައިނަލްއަޤްވާމީ މިންގަނޑުތަކެއް ކަނޑައެޅުމަށް ބާރުދިނުމުގެ ގޮތުން ދުނިޔޭގެ 35 އަށްވުރެ ގިނަ ޤައުމުގެ ބައިވެރިވުމާއެކު އދ. އިން ބަލައިގެންފައިވާ ކޮންވެންޝަނެކެވެ.
ޓްރެފިކް ޤާނޫނުތަކާއި ޤަވާއިދުތަކަށް ބޯނުލެބުމުގެ ސަބަބުން ފަހަކަށް އައިސް ނުރައްކާތެރި އެކްޝިޑެންޓުތައް ހިނގާ މިންވަރުވަނީ ވަރަށްބޮޑަށް އިތުރުވެފައެވެ. އެކްޝިޑެންޓުތައް މަދުކުރުމަށްޓަކައި ޓްރާންސްޕޯޓް މިނިސްޓްރީން މިހާރުވެސް އަންނަނީ ހަރުދަނާ ފިޔަވަޅުތަކެއް އަޅަމުންނެވެ.
މީގެ ތެރޭގައި ލައިސަންސް ދިނުމުގެ އުސޫލު ހަރުދަނާކުރުމާއި، އެކްސިޑެންޓްތަކުގައި އަނިޔާވާ މީހުންނަށް ފުރަތަމަ އެހީދޭނެ ގޮތްތަކާއި، މަގުމަތީގެ ސަލާމަތާއި ރައްކާތެރިކަމާގުޅޭގޮތުން އާއްމުން ހޭލުންތެރިކުރުވުން ހިމެނެއެވެ.