އެމްޑަބްލިއުއެސްސީގެ ފެން ރައްކާކުރުމުގެ ޤާބިލްކަން އިތުރުކުރުމަށްޓަކައި މާލޭގައި 20000 ޓަނުގެ ދެ ތާނގި ބެހެއްޓުމަށް ނިންމާފައިވާ ކަމަށް އެކުންފުނިން ހާމަކޮށްފިއެވެ.
މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީއިން ބޭއްވި ނޫސްވެރިންގެ ބައްދަލުވުމެއްގައި އެކުންފުނީގެ މެނޭޖިންގ ޑިރެކްޓަރ އާދަމް އާޒިމް ވިދާޅުވީ މާލޭގައި އެސްޓީއޯގެ ރެޑީ މިކްސް ސިމެންތި ތައްޔާރުކުރުމުގެ މަސައްކަތް ކުރަމުންދާ ބިން އެމްޑަބްލިއުއެސްސީއަށް ދިނުމަށް ސަރުކާރުން ނިންމާ އެކަމާ ގުޅޭ ލިޔުން ހަވާލުކޮށްފައިވާ ކަމަށެވެ.
"ވޯޓަރ ސްޓޯރޭޖް އިތުރުކުރުމަށްޓަކައި، އެސްޓީއޯގެ ރެޑީ މިކްސް ސިމެންތް ހަދާ ބިން އަޅުގަނޑުމެންނަށް ދީފައިވާ ކަމަށް ބުނެ ސިޓީވަނީ ލިބިފައި، އެތަނުގައި 20000 ޓަނުގެ ފެން ރައްކާކުރާ ދެ ތާނގި ބަނދެވިގެންދާނެ، އަޅުގަނޑުމެން މި ބަލަނީ އެބިމުގައި ވީހާވެސް ގިނައިން ފެން ރައްކާކުރެވޭނެ ގޮތަކަށް ޑިޒައިންކުރުމުގެ މަސައްކަތްކުރެވޭތޯ،" އާދަމް އާޒިމް ވިދާޅުވިއެވެ.
އާޒިމް ވިދާޅުވީ އެބިން ކުރިއަށް އޮތް ދޮޅު މަސްދުވަހުގެ ތެރޭގައި އެމްޑަބްލިއުއެސްސީއާ ހަވާލުކުރެވިގެންދާނެ ކަމަށެވެ. އަދި އަހަރެއްހާ ދުވަހުގެތެރޭގައި ސްޓޯރޭޖް ފެސިލިޓީތައް ޤާއިމްކުރެވިގެންދާނެ ކަމަށެވެ. މީގެ އިތުރުން އެމްޑަބްލިއުއެސްސީގެ ސްޓޯރޭޖް ބޮޑު ކުރުމަށް އިތުރު ބިންތައް ހޯދައިދިނުމަށް ސަރުކާރުން މަސައްކަތް ކުރުމުންދާ ކަމަށްވެސް އާޒިމް ވިދާޅުވިއެވެ.