ރާއްޖޭގެ އެތެރޭގެ އުދުހުންތަކަށް ޚާއްސަކޮށްގެން ދާދި ފަހުން އޮޕަރޭޓްކުރަން ފެށި މަންޓާ އެއަރގެ ތިންވަނަ މަތިންދާ ބޯޓު އަންނަ އާދީއްތަ ދުވަހު ރާއްޖެ ގެނައުމަށް ހަމަޖެހިފައިވާ ކަމަށް އެ އެއާރލައިނުން ހާމަކޮށްފިއެވެ.
މަންޓާ އެއަރގެ އުދުހުންތަކުގައި ބޭނުންކުރުމަށް ގެންނަ މި މަތިންދާ ބޯޓު ރާއްޖެއަށް އައުމަށް މިހާރު ވަނީ ދަތުރު ފަށާފައެވެ. ބޯޓު ރާއްޖެ އައުމަށް ދަތުރު ފަށާފައިވަނީ، ޑެންމާކުންނެވެ. ދަތުރުގައި މި ބޯޓު ގްރީސް، މަސްކަޓް އަދި ރިޔާޛްގައި މަޑުކުރުމަށްފަހު އާދިއްތަ ދުވަހުގެ ވަގުތެއްގައި ރާއްޖެ އަންނާނޭކަމަށް މަންޓާ އެއަރއިން ބުނެއެވެ.
މަންޓާ އެއާރގެ ދަތުރުތަކުގައި ބޭނުންކުރުމަށް މިފަހަރުވެސް ގެންނަނީ އޭޓީއާރު 72-600 މަރުކާގެ 64 ގޮނޑީގެ ޖާގައިގެ ބޯޓެކެވެ.
މަންޓާ އެއަރއިން އަދި މިހާތަނަށް އުދުހުންތައް ބާއްވަމުން އަންނަނީ، ވެލާނާ އިންޓަރނޭޝަނަލް އެއާރޕޯރޓުން ދ.ކުޑަހުވަދޫ އެއާޕޯރޓަށެވެ. އެގޮތުން ހަފްލާއަކު 4 ދަތުރު މަންތާއެއާއިން ދ.ކުޑަހުވަދޫ ކުރަމުންދާއިރު، އެއަރލައިންގެ ދަތުރުތައް ފުޅާކުރުމަށްވެސް ދަނީ މަސައްކަތްތަކެއް ކުރަމުންނެވެ.
މަންޓާ އެއަރއިން ބުނީ، ބ.ދަރަވަންދޫ އަދި ތ. ތިމަރަފުށީ އެއާރޕޯރޓަށް ދަތުރުތައް ފެށުމަށް ތައްޔާރުވަމުން ދާކަމަށެވެ.