ވަރލްޑް ސަމިޓް އޮން އާޓްސް އެންޑް ކަލްޗަރގެ 8ވަނަ ބައްދަލުވުމުގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ބައިވެރިވެވަޑައިގެންފިއެވެ.
އިންޓަރނޭޝަނަލް ފެޑަރޭޝަން އޮފް އާޓްސް ކައުންސިލްސް އެންޑް ކަލްޗަރ އެޖެންސީސް (އިފަކާ)އިން ކޮންމެ 3 އަހަރަކުން އެއް އަހަރު ބާއްވާ މި ސަމިޓް މިއަހަރު ކުރިއަށް ދަނީ މެލޭޝިޔާގެ ކުއަލަލަމްޕޫރުގައި، މިމަހުގެ 12ވަނަ ދުވަހުންފެށިގެން 14 ވަނަ ދުވަހުގެ ނިޔަލަށެވެ.
އައު ނަޒަރުތަކުން، އުފެއްދުންތެރި ގޮތްގޮތަށް، ސަގާފަތާއި ފަންނުވެރިކަމަށް ބަލައިލުމާއި މިކަންކަމާ ޚިޔާލު ބަދަލުކޮށް މަޝްވަރާކުރުމަށް ކުރިއަށް ގެންދާ މި ސަމިޓްގެ މިއަހަރުގެ ޝިއާރަކީ "ހުޅުވިފައިވާ ވިސްނުމަކުން: ސަގާފަތާއި ޢިލްމާއި ބަދަލު ނުވަތަ މޯބައިލް މައިންޑްސް: ކަލްޗަރ، ނޮލެޖް އެންޑް ޗޭންޖް"އެވެ.
މި ސަމިޓަކީ ބަވަނަވުމާއި، ޓެކްނޮލޮޖީއާއި، ތިމާވެއްޓަށް އަންނަ ބަދަލުތަކުގެ ސަބަބުން ޤައުމުތަކުގެ ސަގާފީ އަދި ފަންނީ ދާއިރާތަކަށް ކުރިމަތިވަމުންދާ ބޮޑެތި ގޮންޖެހުންތަކަށް ޙައްލު ހޯދުމުގައި ހުޅުވިފައިވާ ވިސްނުމަކުން ވިސްނުން ފެށުމަށް ކުރިއަށް ގެންދާ ސަމިޓެކެވެ.
ވާރލްޑް ސަމިޓް އޮން އާޓްސް އެންޑް ކަލްޗަރގެ ސަބަބުން ބައިނަލްއަޤުވަމީ މައިދާނެއްގައި ސަގާފަތާބެހޭ އިދާރާތަކާއި މިދާއިރާއާ ގުޅުން ހުރި ތަފާތު އެކިއެކި ފަރާތްތައް އެއްތަންވެ، އެކުގައި މަޝްވަރާ ކުރުމުގެ ފުރުސަތު ލިބޭނެއެވެ.
އަދި މި މަޝްވަރާތަކުގެ އަލީގައި ގުޅިގެން މަސައްކަތްތައް ކުރެވިދާނެ ގޮތްތަކާއި، ކުރިމަތިވާ ތަފާތު އެކި ދަތިތައް ޙައްލު ކުރެވޭނެ ގޮތްތަކެއް ހޯދުމަށް މަގު ފަހިވެގެންދާނެކަމަށް ހެރިޓޭޖް މިނިސްޓްރީން ވިދާޅުވެއެވެ.
މިފަދަ ސަމިޓެއްގައި ބައިވެރިވުމުގެ ސަބަބުން، މި ދާއިރާއިން ދިވެހިރާއްޖެއާއި އެހެނިހެން ޤައުމުތަކާދެމެދު ގުޅުންތައް އިތުރަށް ބަދަހިވެ، ދިވެހީންނަށް މިދާއިރާއިން ކުރިއަށްދިއުމަށް އިތުރު ފުރުޞަތުތައް ފަހިވެގެންދާނެކަމަށްވެސް މިނިސްޓްރީން މަޢުލޫމާތު ދެއްވައެވެ.
އަދި މި ސަމިޓުގައި ސަގާފަތާއި ފަންނުވެރިކަން ކުރެއެރުވޭނޭ ފަހުގެ ގޮތްތަކާމެދު މަޝްވަރާކޮށް، ޢަމަލީގޮތުން މިކަން ކުރެވޭނެ ގޮތްތައް ދެނެގަނެ މިމަސައްކަތުގައި އެކި ޤައުމުތަކުގައި ޢަމަލުކުރަމުންދާ ގޮތްތައް ޙިއްސާކުރުމަށް ވަނީ ހަމަޖެހިފައެވެ.
މި އަހަރުގެ ވަރލްޑް ސަމިޓް އޮން އާޓްސް އެންޑް ކަލްޗަރގައި 81 ގައުމަކުން 432 ބޭފުޅުން ބައިވެރިވެއެެވެ.