ރައްޔިތުންގެ އިހްސާސްތައް ދައުލަތުގެ ތެރޭގައި ހިމެނުމަށް ދައުލަތުގެ ތިން ބާރަށްވުރެވެސް މަދަނީ ޖަމިއްޔާތަކުގެ ދައުރު މުހިންމުކަށް އިކޮނޮމިކް މިނިސްޓަރ ފައްޔާޟް އިސްމާއިލް ވިދާޅުވެއްޖެއެވެ.
ރާއްޖޭގެ މަދަނީ ޖަމިއްޔާތައް ބާރުވެރިކުރުވުމުގެ ގޮތުން ބާއްވާ "ހަވަލި ފެއަރ" ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޟް އިސްމާއިލް ވިދާޅުވީ ދިވެހިރާއްޖެއަށް ޑިމޮކްރަސީ ގެނައުމަށް ކުރި މަސައްކަތުގައި އެންމެ މުހިންމު އެއް ދައުރެއް އަދާކުރީ މަދަނީ ޖަމއިްޔާތައްކަމަށެވެ. އަދި މަދަނީ ޖަމިއްޔާތަކަކީ ދައުލަތުގެ ތިންބާރަށްވުރެވެސް ބޮޑަށް ރައްޔިތުންގެ އިހްސާސްތަކާއި ރައްޔިތުން ބޭނުންވާކަންކަން ދައުލަތްތެރޭގައި ހިމެނުމަށް މުހިއްމު ދައުރެއް އަދާކުރެވިދާނެބައެއްކަމަށް ދެކެވަޑައިގަންނަވާކަމަށް މިނިސްޓަރ ވިދާޅުވިއެވެ.
މަދަނީ މުޖުތަމައަކީ ރައްޔިތުންގެ މަޖިލީހަށްވުރެވެސް، ސަރުކާރަށްވުރެވެސް އަދި ޖުޑީޝަރީއަށްވުރެވެސް މުހިއްމު ބައެއް، ރައްޔިތުންގެ އިހްސާސްތައް، ރައްޔިތުން ބޭނުންވާކަންކަން ދައުލަތްތެރޭގައި ހިމެނިގެން ދިއުމަށްޓަކައި. ޒަމާނުންސުރެ އަޅުގަނޑުމެންގެ އާދަކާދަ އޮތީ މަދަނީ މުޖުތަމަޢު ނުވަތަ އާއްމު ރައްޔިތުން ބޮޑަށް ބައިވެރިވެގެން ތަރައްޤީގެ އެކި އެކި މަސައްކަތް ކުރުމުގައި. ނަމަވެސް އަޅުގަނޑުމެންގެ ވައްޓަފާޅި ބަދަލުވެގެން ގޮސް ރައްޔިތުންނާއި މަދަނީ ޖަމިއްޔާތައް ކަންކަމުގައި ބައިވެރިވުން މިއޮތީ މަދުވެފަ." އިކޮނޮމިކް މިނިސްޓަރ ވިދާޅުވިއެވެ.
މިނިސްޓަރ ފައްޔާޟްވަނީ ދައުލަތުގެ ތެރެއިން ކަންކަން ގޯސްވަމުންދާނަމަ ރައްޔިތުންގެ ވިންދާ އެއްގޮތަށް އަޑުއުފުލުމުގައި ބޮޑު ދައުރެއް އަޑާކުރެވޭނެ އެއްބަޔަކީ މަދަނީ ޖަމިއްޔާތައްކަން ފާހަގަކުރައްވާފައެވެ. ދައުލަތުގެ ތެރޭގައި ބޭއިންސާފު ބޮޑުވުމުގެ ސަބަބުން ތަރައްޤީގެ މަސައްކަތުގައި ޖަމިއްޔާތަކުގެ ބައިވެރިވުން މަދުވެފައިވާކަން ފާހަގަކުރައްވައި މިނިސްޓަރ ވިދާޅުވީ މަދަނީ ޖަމިއްޔާތައް ބާރުވެރިކުރުމަށް ބޭނުންވާ ހުރިހާ ކަންކަން ސަރުކާރުން ކޮށްދެއްވާނެކަމަށެވެ. އަދި މަދަނީ ޖަމިއްޔާތަކުން ރައްޔިތުންނަށް ކޮށްދޭ ކަންކަމުގައި ސަރުކާރުގެ ފުރިހަމަ އެއްބާރުލުން ދެއްވާނެކަމުގެ ޔަޤީންކަން މިނިސްޓަރ ދެއްވިއެވެ.