މިއަހަރުގެ ފުރަތަމަ ކުއާޓަރގެ ތެރޭގައި އެމްޓީސީސީއިން 22 މަޝްރޫއެއްގެ މަސައްކަތް ކުރިއަށް ގެންގޮސްފައިވާ ކަމަށް އެކުންފުނިން ހާމަކޮށްފިއެވެ. މި 22 މަޝްރޫއުގެ ތެރެއިން 12 މަޝްރޫއެއްގެ މަސައްކަތް ވަނީ ކާމިޔާބުކަމާއި އެކު އެ ކުއާޓަރގެ ތެރޭގައި ނިންމާލާފައެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއިން ނެރެފައިވާ މިއަހަރުގެ ފުރަތަމަ ކުއާޓަރގެ މާލީ ރިޕޯޓުގައިވާ ގޮތުން، އެ ކުއަރޓަރުގައި އަލަށް ތިން މަޝްރޫއެއްގެ މަސައްކަތްވަނީ ފަށާފައެވެ. އަދި ހަ މަޝްރޫއެއްގެ މަސައްކަތް އެމްޓީސީސީއަށް ލިބިފައިވާ ކަމަށްވެސް އެކުންފުނިން ހާމަކުރެއެވެ.
ޕީއެސްއެމް ނިއުސްއާ ވާހަކަދައްކަވަމުން އެކުންފުނީގެ ސީއީއޯ ހަސަން ޝާހް ވިދާޅުވީ، މިއަހަރުގެ ފުރަތަމަ ކުއާޓަރުގައި ލިބުނު މަޝްރޫއުތަކުގެ އަގު ހަތަރަސްތޭކަ މިލިއަން ރުފިޔާ އަށް އަރާ ކަމަށެވެ. ނަމަވެސް އެއީ އެމްޓީސީސީ ފަދަ ކުންފުންޏަކަށް މަދު އަދަދެއް ކަމަށާއި އިތުރު ޕްރޮޖެކްޓްތައް ހޯދުމަށް މަސައްކަތް ކުރަމުން ގެންދާ ކަމަށް ޝާހް ވިދާޅުވިއެވެ.
"ދެހާސް ނަވާރަވަނަ އަހަރުގައި ލިބުނު ޕްރޮޖެކްޓްތަށް އުޅޭ ގާތްގަނޑަކަށް ހަތަރަސްތޭކަ މިލިއަނާ ގާތްކުރޭ، އެމްޓީސީސީ ކަހަލަ ކުންފުންޏަކަށް މިއީ މަދު އަދަދެއް، އަޅުގަނޑުމެން މިހާރުވެސް ވާނެ ކޮމްޕެޓެޓިވް ބިޑިންގަވެސް ޓެންޑަރ ބޯޑުން އިޢުލާންކުރާ އެލިޖިބަލްވާ ހުރިހާ ޕްރޮޖެކްޓްސްތަކަށް މިދަނީ ބިޑުތައް ލަމުން، ވަރަށް ބައިވަރު ޕްރޮޖެކްޓްސްތައް ޕައިޕްލައިންގައި އެބަހުރި، ކާމިޔާބުވާނެ ކަމަށް ޤަބޫލް ކުރަނީ" ޝާހް ވިދާޅުވިއެވެ.
ފުރަތަމަ ކުއާޓަރުގައި ބިން ހިއްކުމާއި، ފަޅު ފުންކުރުމުގެ 6 މަޝްރޫއެއް ކުރިއަށްގެންގޮސްފައިވާއިރު، އޭގެތެރޭގައި، މާވަރު ލެގޫން ބިން ހިއްކުމާއި، ކ. ތިލަފުށީ ބިން ހިއްކުމާއި ގޮނޑުދޮށް ހިމާޔަތްކުރުމާއި، ގދ. ފަރެސްމާތޮޑާ ބިން ހިއްކުމާއި ގޮނޑުދޮށް ހިމާޔަތްކުރުން ފަދަ މަޝްރޫއުތައް ހިމެނެއެވެ.